E fundit!

11:38 Aktualitet

Dalin mesazhet/ Deputetët e PD-së kundër bojkotit të seancës në Kuvend

Vendimi i Partisë Demokratike për të mos marrë pjesë në se...

Rasti Veliaj, brutal dhe banal, as i sofistikuar, as intelektual

17 Korrik 2024, 12:02, Opinione Grigels Muçollari

Aferat e Erion Veliajt nuk janë as të sofistikuara, as krime intelektuale të vështira për t’u zbardhur.
Ai është përgjegjësi për "5D" dhe për skandalin financiar të inceneratorit të Tiranës, ku në të dyja rastet si titullar i bashkisë është direkt i përfshirë.

Asnjë rrethanë ligjore nuk e shpëton dhe nuk e zbut rolin e tij. E vetmja gjë që po i krijon imunitet dhe qëndrim mbi ligjin, është dashamirësia që po tregojnë kolegët e SPAK-ut.

Inceneratori i Tiranës nisi me këmbënguljen e tij. 3 herë është refuzuar kjo skemë e madhe e abuzimit me taksat e qytetarëve të Tiranës nga ministrat e Financave, Shkëlqim Cani dhe Arben Ahmetaj. Por ka qenë insistimi i Veliajt me firmën e tij, dhe në emër të Këshillit Bashkiak që i hapi rrugën kësaj afere që deri tani ka marrë më shumë se 130 milionë euro, e ku ndërkohë incenerimi nuk bëhet. Inceneratori nuk ekziston.

Arben Ahmetaj ka dhënë dëshmi për sjelljen e Erion Veliajt si pronar faktik të inceneratorit të Tiranës. Këtu nuk ka asgjë të sofistikuar, dhe as intelektuale, që SPAK-u të mos e shohë apo dallojë. Çdo student i juridikut e konstaton përgjegjësinë dhe lidhjen direkte të Erion Veliajt me këtë krim. Krim për të cilin shumë veta janë para ligjit, të arrestuar e në proces, përveç përgjegjësit kryesor, që është Erion Veliaj.

Në rastin e aferës "5D", ka edhe më pak sofistikim e krim intelektual. Eshtë e qartë si drita e diellit se vetëm “kolegët” me dashamirësinë e tyre mund të besojnë fabulën qesharake se Erion Veliaj nuk dinte gjë se ç’bënin bashkëpunëtorët e tij kryesorë në bashki, drejtorët me të cilët ai ka marrë vendime, me të cilët ka ndarë pushtet, me të cilët kalonte darkat e vona, me të cilët drejtonte fushatën, e kalonte fundjavat, dhe me të cilët bënte pushimet jashtë vendit.

Asnjë “5D” nuk mund të krijohej e nuk mund të funksiononte pa bekimin e titullarit të institucionit, pra pa dakordësinë e kryetarit të bashkisë. Nuk janë 2 procedura, e 3 transaksione. Nuk janë disa lëvizje në njësi të largëta bashkiake, por janë mbi 30 prokurorime në zemër të bashkisë, dhe mbi 30 milionë euro që "5D" ka marrë. Sipas gjykatësit, "5D" ka funksionuar si grup i strukturuar kriminal. Dhe dihet që një grup i strukturuar kriminal, vepron nën komandën, nën udhëheqjen e më të pushtetshmit, që në këtë rast është Erion Veliaj.

Në të dyja këto afera, kryetari i Bashkisë së Tiranës është haptazi, drejtpërdrejt, përgjegjës. Këto janë vjedhje brutale, banale dhe nuk ka asgjë këtu as intelektuale, as të sofistikuar.

Ndaj, mbrojtja që SPAK-u dhe kreu i saj, Dumani, i bënë Veliajt në Parlament është e papranueshme.

Ne presim që kreu i SPAK-ut të jetë në anën e drejtësisë, të qytetarëve, të taksapaguesve të Tiranës që janë abuzuar e nëpërkëmbur nga kryetari i tyre i bashkisë. Pozicionimi i tij në krah të Veliajt, është tradhti ndaj publikut, ndaj shpresave që kanë njerëzit te drejtësia e re.

Apologjia e Dumanit ndaj Veliajt në Parlament është një ftesë për më shumë rezistencë. Tani mesa duket kërkesa për drejtësi duhet orientuar në adresë tjetër, në dyer të tjera. Derisa SPAK-u të tregojë se Erion Veliaj është i barabartë si të gjithë qytetarët e tjerë para ligjit./CNA