E fundit!

13:56 Politikë

"Janë ngritur kundër qeverisë me të drejtë"/ Berisha: PD nuk e ka thirrur protestën, por e mbështet

Kryetari i PD-së, Sali Berisha, ka mbajtur fjalën e tij në...

Mos përçani protestën!/ Mos fyeni dhe denigroni popullin!

10 Qershor 2026, 12:30, Opinione Arben Malaj

MOS PËRÇANI PROTESTËN! Mos fyeni dhe denigroni popullin!

I vlerësoni që janë idealistë dhe jo xhepistë.

I vlerësoni për gjithë kontributet e tyre të ndershme dhe atdhedashëse.

Pasi i vlerësoni dhe i respektoni sinqerisht, i ftoni plot mirënjohje të bëhen pjesë e misionit për "Shqipërinë e Re".

Mbrëmë një folës/"artist" i papërmbajtur, denigronte socialistët e thjeshtë pse mbështesnin dhe votonin Rilindjen.

Të njëjtën gjë bëjnë të tjerë edhe për demokratët e thjeshtë e pa asnjë privilegj, pse mbështesin PD-në.

E para, populli shqiptar në 35 vite e ka kërkuar vazhdimisht ndryshimin: ka votuar Berishën, Nanon; ka mbështetur Majkon, Metën; ka rivotuar Berishën e Metën; dhe ka votuar Ramën.

Rama e vrau besimin publik për një pushtet të babëzitur, deri edhe kriminal.

Pra, përgjegjësia nuk është te mbështetësit e çdo partie politike, por te liderët që kanë tradhtuar popullin e tyre dhe që janë pasuruar aq shpejt dhe në mënyrë aq kriminale, siç i përshkruan poeti i madh shqiptar, Ali Asllani, te poezia e tij "Hakërim" – e cila mund dhe duhet të ishte himni i kësaj proteste.

Pse dështojnë protestat që denigrojnë popullin?

Humbja e fuqisë frymëzuese:

Një protestë që vetëm shan dhe denigron e humbet fuqinë inspiruese dhe gradualisht venitet.

Përçarja familjare dhe shoqërore:

Në protestë janë edhe fëmijët, nipërit e mbesat e atyre që disa prej folësve i denigrojnë publikisht dhe pa asnjë të drejtë morale.

Ata që i votojnë partitë e tyre nuk janë pjesa e kalbur e shoqërisë dhe politikës; ata nuk janë abuzuesit, sepse nuk kanë pasur kurrë pushtet real.

Kur liderët populistë tradhtojnë shpresën: Shembuj historikë

Historia botërore tregon se kur lëvizjet popullore kthehen në mjete denigrimi apo kur udhëhiqen nga liderë populistë, kauzat legjitime tradhtohen sapo këta liderë marrin ose mbajnë pushtetin:

Aung San Suu Kyi (Mianmar): Nga një simbol botëror i paqes, demokracisë dhe lirisë, e vlerësuar me Çmimin Nobel, sapo erdhi në pushtet bashkëpunoi me ushtrinë dhe u shndërrua në mbrojtëse të spastrimit etnik e krimeve ndaj komunitetit Rohingya. Besimi i popullit që sakrifikoi për të u tradhtua në mënyrën më makabre.

Lëvizja e "Këmishave të Kuqe" (Tajlandë):

Miliona qytetarë të thjeshtë e të varfër protestuan për vite me radhë duke kërkuar drejtësi sociale, bëshmërisht u përdorën thjesht si mish për top nga lideri i tyre populist, miliarderi Thaksin Shinawatra, për të mbrojtur pasurinë dhe interesat e tij oligarkike.

Tradhtia e Lëvizjeve Populiste në Amerikën Latine:

Në vende si Venezuela, lëvizjet që nisën në emër të popullit të thjeshtë kundër elitave të korruptuara, u kthyen në regjime ku liderët u pasuruan në mënyrë përrallore, ndërsa populli ra në varfëri ekstreme.

Mesazhi është i qartë:

Armiku nuk është votuesi i thjeshtë socialist, demokrat apo i çdo partie politike.

Armiku vrastar i shpresës dhe së ardhmes për një "Shqipëri të Re" është:

korrupsioni dhe babëzia

e liderëve që tradhtojnë besimin e popullit të tyre!

Ditë të mbarë dhe plot pozitivitet!/ CNA