MODELI VELIAJ, DËSHTIM I REPUBLIKËS SË RINISË PATRONAZHISTE

Fundi i udhëheqësisë së Bashkisë Tiranë është treguesi më i qartë se ç’mund të sjellë modeli i qeverisjes me të rinj patronizhistë, gjuetarë të pasurive publike pa djersë pune të ndershme…

24 Mars 2026, 10:13, Opinione Xhovan Shyti

Modeli i qeverisjes së Republikës së Rinisë Patronazhiste dështoi. Revanshin ia ndali SPAK, me zbulimin e përfshirjes së udhëheqësisë së lartë në skemë korrupsioni e abuzime me postet zyrtare që mbanin.

Arrestimi i drejtorëve të Bashkisë Tiranë të skemës “5D” ishte qysqia e parë që goditi murin e kështjellës së Republikës së Rinisë Patronazhiste të ngritur nga Erion Veliaj, i vënë nën masën arrest me burg, me vendim të Gjykatës së Posaçme.

Kalimi i kryekështjellarit të Republikës së Rinisë Patronazhiste në paraburgimin e Durrësit solli tronditje e çoroditje institucionale. Kur ka kaluar më shumë se një vit nga izolimi në qeli, e mosdhenia e dorëheqjes nga Veliaj, ende në detyrë si kryetar, mosshkarkimi i tij nga Kryeministri, ka sjellë administrimin e çaltë, deri në inekzistencë të Bashkisë së kryeqytetit.

Situatë kjo që do të vijoj derisa “shemrave” tu rikthehet arsyeja e mosarsyes që ia turbullon vatrën arsyetuese të psikikës.

Erion Veliaj njihet si realizuesi i Republikës së Rinisë Patronazhiste të “Rilindjes” edramiste. Ai ka qenë partizan ambicioz i ngritjes së një strukture qeverisëse, me sundim të të rinjve.

Ide kjo mëse e përligjur, ndërkohën kur pjesa “dudume” e zyrtarëve politikë miks të gjeneratës së vjetër, s’kishte sjellë asgjë më shumë se sabotim të qeverisjeve paskomuniste.

Mirëpo ndodhi që me Veliajn në krye, administrata rinore e Republikës Patronazhiste të “rilindjes”, u kthye si dikur detashmentet e kryqtarëve që në emër të misionit religjonal bënin shkrumb e hi çdo heretik.

Heretikët e Republikës patronazhiste Veliaj nuk godisnin me zjarr e hekur, por me metodat e tyre, një ndër kryesoret e të cilave ishte mbjellja e farës së korrupsionit pa kufi. Këtë e nxorri në dritë goditja e SPAK.

Së bashku me faktin që etja për pasurim me çdo kusht (me para të dala nga xhepi i taksapaguesve), ishte kthyer në devizë e pjesës dërrmuese të drejtuesve të Republikës, ku vendin e prijësimit e mbante Erion Veliaj.

Njeriu që karrierën politike e nisi në vitin 2011, kur iu bashkua Kryesisë së PS, si Sekretar për Rininë dhe Emigracionin. Në zgjedhjet parlamentare të vitit 2013 Veliaj u zgjodh deputet i Qarkut Gjirokastër.

Pa asnjë përvojë e eksperiencë pune, Erion Veliaj u katapultuar, nga “rilindasi me shtatë yje” Edi Rama, fal aftësisë zvarritëse të ngjitjes në maj, Erion Veliaj i tha mirëmëngjes punës, kur kapi poste të rëndësishme në erën qeverisëse të rilindjes Rama.

Më së pari shijoi kolltukun e kreut të Ministrisë së Mirëqënies Sociale dhe Rinisë, ku falë llapaqenërisë së vlefshme për aplikimin e gebelizmit, ja doli të fitoi aq pikë politike sa i duheshin tek socialistët “rilindas” të Ramës.

Me propagandën gebelsiane të lumit të premtimeve të pambajtura e kontributin e paepur të të rinjve të Republikës patronazhistë, Edi Rama ja doli të merrte pushtetin në 2013.

Dy vite pas tij, nëpërmjet të njejtës rrugë, kryepatronazhisti i paepur i të majtës “rilindase”, ish-drejtuesi i klubit “G99”, Erion Veliaj, fitoi Bashkinë e Tiranës.

Duke e materializuar fare hapur ambicien e tij për shndërrimin e institucionit të popullit kryeqytetas në parcelë eksperimentale qeverisjeje të Republikës së të Rinjve Patronazhistë.

Me politikën e kositjes së pjesës jo patronazhiste të administratës së “gjeneratës së vjetër”, në emër të reformës, Erion Veliaj, i vetëquajtur në ngazëllim e sipër “Lali Eri”, e pakuptueshmërisht “Zdromsi”, ja doli të mbillte spastrimin moshor.

Dhe të ngrinte Republikën e Rinisë Patronazhistë. Dhe ja ku jemi sot, tetë vite pas qeverisjes, nga gjaku i ri "Eronian". Vite gjatë të cilave Republika Veliaj jo vetëm nuk u rilind por u katandis me administratën më të korruptuar në Europë.

Përveç drejtorëve të skemës korruptive “5 D”, edhe vetë Erion Veliaj, demagogu gebelsian, i ngritjes e administrimit të qeverisë së Republikës së Rinisë Patronazhiste, ka përfunduar pas hekurave. I akuzuar për 13 vepra të rënda penale.

Fundi i udhëheqësisë të Bashkisë Tiranë është treguesi më i qartë se ç'mund të sjellë modeli i qeverisjes me të rinj patronizhistë, gjuetar të pasurive publike pa djersë pune të ndershme.

Patronazhistët e Republikës së Rinisë Veliaj nuk zgjodhën si refren shërbestarinë ndaj taksapaguesve por qenien zullumqarë të pangopur të pasurimit korruptiv. Kredo kjo, fatkeqësisht, e qenë ende në funksion edhe pas luftës frontale që i ka shpallur SPAK./ CNA