E fundit!

08:01 Kosova & Bota

Ari bie pavarësisht inflacionit të lartë në SHBA, ekspertët shpjegojnë arsyet

Ari po shkon drejt muajit të katërt radhazi në rënie, pava...

Fatura e "fshehur" e naftës

20 Mars 2026, 08:58, Opinione Klevis Elezi

Rritja e çmimit të karburantit në nivelin 200 lekë/litër nuk është thjesht një shqetësim i përditshëm për drejtuesit e automjeteve, por një goditje e drejtpërdrejtë në strukturën ekonomike dhe në sigurinë logjistike të vendit.

Në një ekonomi si ajo shqiptare, e varur ndjeshëm nga importet dhe transporti rrugor, çdo rritje e naftës përkthehet automatikisht në një zinxhir kostosh që përfundon te qytetari.

Një faturë shtesë që përllogaritet rreth 200 milionë euro në vit për konsumatorët shqiptarë nuk është alarmiste është realiste. Karburanti është një nga komponentët bazë të çdo hallke ekonomike: nga transporti i mallrave, te magazinimi, shpërndarja dhe deri te çmimi final në raft.

Në këtë kuptim, rritja e naftës nuk prek vetëm sektorin e transportit, por inflacionin në tërësi.

Efekti domino është i qartë: rriten kostot e transportit, rriten çmimet e produkteve bazë, ulet fuqia blerëse dhe ngadalësohet konsumi. Bizneset e vogla dhe sektori i shërbimeve janë ndër më të goditurit, pasi kanë më pak hapësirë për të absorbuar kostot shtesë.

Nga këndvështrimi i logjistikës dhe sigurisë detare, situata është edhe më e ndërlikuar. Shqipëria, si një vend me dalje strategjike në det dhe me varësi të lartë nga importet detare, është drejtpërdrejt e ekspozuar ndaj luhatjeve të çmimeve ndërkombëtare të naftës.

Tensionet në nyje kritike të tregtisë globale si ngushticat detare dhe korridoret energjetike ndikojnë menjëherë në koston e transportit dhe sigurimit të mallrave.

Në raste krizash ndërkombëtare, si bllokimet apo pasiguritë në rrugët detare, kostot e fracht-it dhe sigurimit rriten ndjeshëm.

Këto kosto nuk mbeten në nivel kompanish, por transferohen direkt në tregun vendas. Shqipëria nuk ka luksin e diversifikimit të thellë energjetik dhe mbetet e ndjeshme ndaj çdo goditjeje të jashtme.

Në këtë realitet, roli i institucioneve bëhet thelbësor. Administrata doganore dhe strukturat fiskale duhet të garantojnë transparencë, efikasitet dhe kontroll real mbi tregun e karburanteve.

Çdo mungesë kontrolli krijon hapësirë për abuzim, ndërsa çdo vonesë proceduriale shton koston përfundimtare.

Megjithatë, perceptimi publik mbetet kritik dhe shpesh i justifikuar. Qytetarët e lidhin rritjen e çmimeve jo vetëm me tregjet ndërkombëtare, por edhe me barrën e lartë fiskale mbi karburantin.

Shqipëria vijon të ketë një nga nivelet më të larta të taksimit të karburantit në rajon, çka e amplifikon efektin e çdo rritjeje globale.

Në planin politik, kjo situatë vendos qeverinë përballë një ekuilibri të vështirë: të ruajë të ardhurat buxhetore pa e rënduar më tej konsumatorin.

Çdo ndërhyrje qoftë në formën e subvencioneve, uljes së taksave apo kontrollit të tregut duhet të jetë e matur, pasi ndikimi është i menjëhershëm dhe socialisht i ndjeshëm.

Rritja e çmimit të naftës nuk është një krizë e përkohshme, por një sinjal i qartë i brishtësisë së modelit ekonomik.

Pa një strategji të mirëfilltë për diversifikimin energjetik, rritjen e eficiencës logjistike dhe forcimin e kapaciteteve vendase, Shqipëria do të vijojë të paguajë “faturën e fshehur” të varësisë nga jashtë./ CNA