Manual për fillestarë: Si të çmontojmë mekanizmin e absurdit shqiptar dhe si ta rimontojmë pa asnjë gabim

25 Korrik 2022, 11:56, Opinione Sonila Meço

Manual për fillestarë: Si të çmontojmë mekanizmin e

Batutë me nënqeshje cinike në Kuvend nga ana e Kryeministrit mbi pamundësinë e Kryetarit të PD-së për udhëtime përtej oqeaneve, deteve, lumenjve, liqeneve…

Editoriale në portale pranë qeverisë mbi fundin politik të liderit të opozitës dhe vërshime komentesh kryesisht të paguara online, nga inati për ndërtimin e perceptimit se opozita në këto kushte mori fund.

Shpallje “non grata” e Berishës nga vendet përtej oqeaneve, deteve, lumenjve, liqeneve. Ose vetnjoftim nga e ana e Kryetarit të PD-së mbi prezencën e tij në listën “non grata”, kur këtë nuk e bëjnë vetë përfaqësitë diplomatike të vendeve përtej oqeaneve, deteve, lumenjve dhe liqeneve.

Krijim konspiracionesh me marinim paranojash, mashtrimesh, aludimesh, sugjestionimesh në prime-time, rrjete sociale mbi mbështetjen e fortë, sublime e të paekuivok për arsye të “ashtu ësht nji muhabet” të Kryeministrit të vendit nga administrat e vendeve përtej oqeaneve, deteve, lumenjve, liqeneve.

Përfundime të pakontestueshme nga zëra publikë mbi shkatërrimin përfundimtar të opozitës. Thirrje publike nga të paguar, por edhe të pavarur për dorëheqjen e Kryetarit të Opozitës, largimin përfundimtar nga politika.

Publikime nga shtypi serioz dhe risjellje në kujtesë të këshilltarëve e lobistëve ndërkombëtarë, që vijnë vërdallë nëpër Shqipëri e Ballkan duke veneruar mrekullinë e pushteteve autoritariste. Dikush duke drejtuar mbledhje qeverie, dikush duke vënë në rresht liderët e “Open Balkan” e dikush duke pritur në zheg në shkallët e Kuvendit për një copë rrogë në lek.

Bërje “kurban” alias shkarkime ministrash, zv kryeministrash, drejtorë drejtorish me përcjellje me stil për “suksese në jetë” e motivacione cinike, lëndë e parë për meme dhe humor rrjeti.

Deklarata të ashpra të Kryeministrit mbi SPAK-un e dendur me dosje zyrtarësh e pushtetarësh, që nuk vepron mbi ish zyrtarë e ish pushtetarë të opozitës.

Dhe….

Nga e para, sipas kësaj radhe…

…deri në ministrin e fundit.

Kryetari i opozitës shpallet “non grata” para çdo shkarkimi e skandali të pushtetit.

Kujdes! Kryeministri nuk ka dijeni për asnjë aferë të bashkëpunëtorëve të tij, por di saktësisht kur e për çfarë shpallet “non grata” Kryetari i Opozitës.