E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Kutia e Veliajt

29 Gusht 2025, 16:06, Opinione Luçiano Boçi

Kutia e Veliajt

Erion Veliaj e ka kaluar “hutimin e parë”.

I fokusuar fillimisht tek opozita e më pas te prokurori, me gjuhën tipike agresive, ai duket qartë se e ka kuptuar se kush qëndron pas burgosjes së tij dhe eliminimit politik de facto.

Retorikat e dikurshme për reformën e famshme në drejtësi dhe për udhëheqësin e lavdishëm, janë zëvendësuar tanimë me gjuhë goditëse të koduar dhe kërcënime.

I braktisur nga të gjithë miqtë e dikurshëm ai po mundohet të dëshmohet si i zbritur në realitet dhe të lëshojë sinjale të forta se mund të kthehet në një “pentito” dhe të hapë “Kutinë e Pandorës” alias “Qivurin e pushtetit të Ramës”.

Po a ka Veliaj një "Kuti Pandore"?

Dhe sa të tilla ekzistojnë për pushtetin e korruptuar në shumë dimensione deri në qelizë?

Nisur nga faktet e njohura dhe botërisht që lidhen me aferën e inceneratorëve, pastrimin e parave, lidhjet kriminale e deri në perversitetin e interpretimit të pushtetit, duket që kutia e Veliajt është plot.

Por paralajmërimi i koduar i tij ngjan se shkon dhe përtej fakteve ndoshta të lidhura edhe me faktorë të tjerë të padalë ende ne dritë, skema grabitjeje perfide e thika pas shpine për njerëz e çështje institucionale. Thuajse një çorbë mafioze e përzier me luks.

Kurioziteti i ngjallur është shumë “joshës”, megjithatë e gjithë kjo ka dëshmuar një gjë absolute të denoncuar publikisht nga opozita: që vendi drejtohet nga një organizatë mirëfilli kriminale që ka pushtuar politikën dhe hapësirën e jetës sociale dhe ekonomike të vendit.

Me një strukturë solide dhe me drejtues një njeri të pushtuar nga e keqja.

Pritet thjesht të nxirret në pah frekuenca reale e gjithë këtij realiteti.

Duhet dhënë përgjigjja dhe për sasinë e “Kutive të Pandorës” që ekzistojnë.

Po, nuk ka vetëm një dhe nuk është vetëm Veliaj që e ka një të tillë.

Kutitë janë shumë.
Kuti ka dhe Beqaj, dhe Koka, dhe Bllako, dhe Ahmetaj.

Kuti kanë edhe ata që janë jashtë dyerve të burgjeve dhe SPAK dhe që ia tundin Ramës me kodim para hunde.

Veliaj e di shumë mirë ketë, sikurse e di që kutia e tij është më e hidhura që mund të hapet, ku helmi dhe e keqja janë të papara e padëgjuara.

Dhe Rama e di.

Ai tani po luan me fillin e durimit të Veliajt dhe duke i njohur karakterin në mënyrë cinike ruan qetësinë dhe ka hedhur në veprim dhe masat e mbrojtjes që pa dyshim janë kriminale dhe pa dyshim akoma më shumë se ato që mund të rrëfehen.

A do të flasë Veliaj?

Ahmetaj foli pjesërisht dhe Rama me SPAK-un e tij u strukën.

Por Veliaj nuk është Beni.

I rritur nën hijen e Ramës dhe “i rrahur” gjithë jetën nga Rama, Veliaj e ka të vështirë.

Nëse tek ai do të kishte një dimension të vogël publik apo dhe politik, ai tashmë do ta kishte bërë.

Paralajmërimet e koduara megjithë tmerrin e fakteve që fshehin brenda, tani duken thjesht lojëra për të fituar lirinë nëpërmjet jo drejtësisë, por nëpërmjet tutorit të tij dhe tutorit të drejtësisë së politizuar, Rama.

Veliaj ose do të zgjedhë fikjen e turpshme politike, siç duken “bathët” duke marrë me vete ca lëshime cinike e ca të vërteta tronditëse, ose do të vendosë një gur kilometrik politik në denoncimin e së keqes dhe thënies së të vërtetave hapur duke ruajtur së paku disa gjëra nga emri i tij.

Kutia me peshën e së keqes brenda, nuk mund të mbahet gjatë në dorë.