Ku e ha bukën, Erion Braçe?

28 Korrik 2025, 18:49, Opinione CNA

Në mes të vapës kur halli i të gjithëve është mungesa e oreksit u shfaq sërish ai, Erioni. Kësaj radhe kishte mbështetur celularin në ekranin e kompjuterit, kishte sistemuar 2 copa buke dhe... aksion.

Megjithëse dukej sikur sulmi i radhës drejtohej kundra administratës tatimore, nëse e analizon temën me të cilin mbajti referatin e radhës Erioni, e kupton që tema nuk ka lidhje me tatim-taksat.

Erioni kërkoi që tatimet të verifikojnë cilësinë e bukës? Dmth të blinin bukë dhe pasi ta linin të zbuluar në ballkon për 24 orë, të verifikonim nëse do ishte bërë dru apo rërë.

Ku e ha bukën, Erion Braçe?

Administrata tatimore nuk teston cilësinë e ushqimeve. Nuk e bën dot megjithëse të gjithë ata që punojnë në tatime hanë bukë.

Administrata tatimore, kontrollon pagesën e detyrimeve tatimore dhe për këtë qëllim sigurisht verifikon çdo faturë deri tek blerja e lëndës së parë.

Mbase kjo protesta më e fundit e Erionit për cilësinë e bukës, erdhi rastësisht pak ditë pasi kryeministri Rama ka njoftuar riorganizimin e inspektoriateve dhe si pjesë e këtij riorganizimi edhe të Autoritetit të Kontrollit Ushqimor.

Por fakti që Erioni ngatërron inspektorët e tatimeve me inspektorët e ushqimit nuk ngatërron njeri.

Ekspozeja dhe testimi live i dy lloje buke, nëse nuk është vetëofrim i Erionit për poste ministrore që lidhen me sigurinë ushqimore, nëse nuk është kërkesë e një grupi brenda mazhorancës për thelën e pushtetit që kalon nga agjencia e pritshme e sigurisë ushqimore, nëse nuk është gjobë për tregtarët e miellit, është populizëm i rëndomtë me bukën e gojës së njerzve pa pushtet.

Braçe i rikthehet fushatës/ Në sulm për ministër Bujqësie
23 Qershor, 11:35

Nëse kjo beteja e Erionit do ishte serioze, atëherë ajo nuk mund të kalonte nga faqja e tij e Facebook, por nga zyrat e shtetit ku pushtetin e gëzon partia e Erionit.

Deputet Erioni, mininalisht në emër të kauzës për mbrojtjen e konsumatorit, (që ai e reklamoi si tallje me taksat e rigonit), duhet të na kishte treguar edhe se tek cili dyqan e kishte blerë bukën që konsumoi live dhe i patrazuar.

Më pas duhet edhe mos të kishte bërë sikur ngatërrohej duke u kërkuar llogari tatimorëve të rigonit.

Lënda e parë për prodhimin e bukës quhet miell i nderuar deputet, nuk quhet akcizë.

Ndaj duhet të tregosh se cili është dyqani që të shiti atë bukë që konsumove live. Nëse di edhe se cilët janë furnitorët e atij dyqani, bën mirë ta thuash edhe këtë.

E nëse nuk e bën, mbetet shumë e dyshimtë buka që ha shpesh live./ CNA