Braçe i rikthehet fushatës/ Në sulm për ministër Bujqësie

23 Qershor 2025, 11:35, Politikë CNA

Erion Braçe i është rikthyer fushatës së tij, fiksimit të vjetër për t’u bërë ministër i Bujqësisë.

Megjithëse është deputet në Njësinë 5 në Tiranë, një nga njerëzit më të votuar në kryeqytet, vazhdon dhe merret me domatet, me specat, me trangujt, me prodhimet e fushës etj., dhe këtë e bën duke luajtur me çmimet, me tregun dhe shitjen e fruta-perimeve.

Mjafton të shohim këtë postim, (LEXO KËTU), por dhe atë që do të vijë në vijim për të kuptuar cila është loja e Erion Braçes.

Nuk ka qëllim, as hall të madh çmimet, se po të kishte atë hall do të merrte nisma ligjore, është deputet, ka qenë zëvendëskryeministër. Nuk bëri asgjë, thjesht dhe vetëm përmbysi karrigen e tij.

Përmbysi karrigen në Kryeministri/ Erion Braçe “kafshon” Ramën
21 Shtator, 10:05

Këto veprime janë fiksimet e vjetra të Braçes, që kërkon o postin e ministrit të Bujqësisë, o “rashë e vdiqa”.

Tashmë ka dalë një nga njerëzit më të votuar dhe me këtë lloj presioni kërkon të rikthehet në kabinetin e Ramës. Nga ana tjetër ai në postime flet për strategjitë e bujqësisë, fushat e prodhimit, si duhet t’u rikthehemi. Pra, me një koncept thuajse të menduar mirë për të treguar që ai është gati të marrë dhe të administrojë një ministri si ajo e Bujqësisë.

Braçe në versionin Vërsëllonja
27 Prill, 14:04

Me shkrimet e Braçes gjërat bëhen “tak-fak”, sot për nesër, me një letër. Ndërkohë që nga partia e tij në pushtet për 12 vite, investimet për bujqësinë janë nga më të ulëtat në rajon, pa folur për nivelin europian. Për të shkuar më tej, se për shkak të mungesës së subvencioneve dhe mbështetjes për sektorin e bujqësisë, janë me qindra mijëra fermerë dhe banorë të fshatrave dhe zonave rurale që janë larguar nga vendi, e kanë braktisur. Nuk mund të punonin ditë e natë dhe në fund të mos ngopnin as barkun me bukë.

"Vërsëllonja" braktis fushatën për PS-në
4 Maj, 15:18

Tani Braçe ka një strategji të qartë, mendon se mundet që me lojëra të tilla të kapë kolltukun e ministrit, se po të kishte hallin e fermerëve do të fliste kur ata protestonin, do të shkonte t’i mbështeste, do të merrte nisma ligjore dhe do të fliste sistematikisht. Jo kujtohet për fermerët sa herë i ngrihet mendja për t’u bërë ministër Bujqësie apo i shfaqen në ëndërr makthet e vjetra në karrigen e zëvendëskryeministrit./ CNA