E fundit!

08:16 Kosova & Bota

Parlamenti i Hungarisë voton për shkarkimin e presidentit nga detyra

Parlamenti i Hungarisë ka miratuar shkarkimin e Presidenti...

Alibeaj të deklarojë se ç'do të bëjë nëse Basha bashkohet me Berishën

12 Mars 2024, 14:51, Opinione Elvi FUNDO

Enkelejd Alibeaj

Ju kujtohet Gazi?

Ai Gazi i tmerrshëm që deklaronte se nëse Berisha merrte vulën, ai dilte nga politika!
E thosh Gazi këtë, se ka shume që besojnë që Gazi nuk kish nga të dilte pasi që nuk kish hyrë asnjëherë në politikë.
Gazi ishte dhe mbeti specialist në një zyrë qeverie. Hap dosjen, nxirr shënime, bëj memo dhe kaq.

Ky ishte Gazi dhe ky ka mbet edhe sot, por pavarësisht kësaj sot të gjithë pyesin ku shkoi betimi i Gazit? Dhe të mendosh që Berisha as vulën nuk e ka marrë akoma, ndërsa Gazi iu bashkua Berishës edhe pa vulë. Të gjithë një nga një iu bashkuan Berishës pasi dikush i nxori 1 nga 1 në konferenca shtypi, “Facebook” apo intervista nga ku deklaronin që nuk do t’i bashkoheshin kurrë “non grata”-s.

Ju kujtohet lista? Dhurata Çupi, Dash Shehi, Ferdinand Xhaferri, Jorida Tabaku, Ervin Salianji, Grida Duma, e ca të tjerë që s'ka votues që ua kujton emrin! Secili nga këta menjëherë pasi u hapeshin ekranet për të deklaruar që nuk i bashkonte më asgjë me “non grata”-n, që e ardhmja e PD-së nuk mund të ishte Berisha, që duhej lidership i ri dhe të tjera si këto klishe, çfarë bënë?

Iu bashkuan Berishës në një mënyrë apo një tjetër. Dikush i shkoi si për qokë në ndonjë nga takimet që Berisha u vinte emrin që dëshironte, kryesi, Këshill Kombëtar, asamble, kongres. Servili për hesap të vet! Tek e tek siç shkonin, pastaj flinin në ndonjë banak darkash në TV ku "sqaronin" që po e bënin për hall të demokratëve.

I vetmi më i sinqertë duket Saimir Korreshi që thjesht "sqaron" që i kanë lënë peng 1 milion euro që ai do t’ua kthejë pasi ta bëjnë deputet. Këta janë figurat e ndritshme të realizmit demokratik që nga dita në ditë përshtasin deklarimet, pritshmëritë dhe gjendjen personale me hallet e demokratëve!

I vetmi që nuk është betuar deri tani qe është gati të djegë biznesin personal politik dhe me Berishën nuk bashkohet kurrë është Lulzim Basha. Sot kishte nxjerrë Alibeajn që të deklaronte që nuk ka dhe nuk do ketë bashkëpunim me Berishën.
I paska ardhur radha Alibeajt të bashkohet me Berishën?

Paska dal sot Alibeu dhe ka deklaruar që Basha nuk bashkohet me Berishën. Nuk e thotë dot vetë Basha këtë?
Pse flet Alibeu në emër të Bashës? Kush po bëhet gati t’i bashkohet Berishës?

Pas kësaj deklarate duhet të përgatitemi që Alibeun ta shohim te Rruga e Salës, apo do vejë Luli te babai i Zenit siç shkoi Gazi. Alibeaj në vend që të bëjë zëdhënësin e Bashës nuk ka nevojë të dalë të betohet (si Gazi) që ai pranon më mirë të largohet nga paradhoma e politikës sesa të bashkohet me Berishën.

Alibeaj të na thotë: çfarë do bëjë kur Basha t’i bashkohet Berishës. Që Alibeaj të duket ndryshe bën mirë ta djegë një akt nga teatri që po luajnë të gjithë prej 3 vjetësh./CNA