Lajmet kryesore deri në orën 12:00

Në një investigim të plotë, CNA ka sjellë në disa shkrime rastin të kompanisë së fluturimeve, që në bishtin e saj mban flamurin shqiptar, në trupin e saj shkruhet: “Air Albania”.

Jo pa qëllim investiguam për disa javë se çfarë po ndodhte me “Air Albania”-n, atë që duhet të bënte krenar çdo shqiptar dhe duhet të fluturonte e lirë në qiell, por mesa duket, nuk u la kurrë e tillë, nga sulmet mediatike, nga akuzat, paragjykimet, gjykimet, gjysmë të vërtetat, të vërtetat. Investiguam pas sulmeve dhe lajmeve të pavërteta që shpërndaheshin në mënyrë kriminale.

Kompania rezultoi me borxhe, ndryshe nga sa ishte premtuar, nuk mundi të shkëlqejë ashtu siç duhej. Një fillim i bukur, por i shkurtër, tani një vazhdimësi në mbijetesë.

Për më tepër, në shumë momente kompanisë i vështirësohej dhe vetëm i rëndohej situata për ta “vrarë”, për ta mbyllur, apo që dikush tjetër të blinte aksionet që të luante me borxhin.

CNA tregoi në disa shkrime se sulmet që vinin ndaj “Air Albania”-s, një pjesë ishin gjysmë të vërteta apo lajme të rreme. Dikush po shpërndante mesazhe. Ne treguam me fakte e dokumente, shumë detaje tronditëse, shkuam deri te vendimet e gjykatës, shifrat e fryra të kateringut të kompanisë.

Treguam se si “Air Albania” gjatë të gjithë kohës kishte pasur dy avionë, ndoshta edhe 1 në momente të caktuara, nga 7 avionë të premtuar në momentin e krijimit të saj. Flota e “Air Albania”-s duhet të ishte me 7 avionë, por nuk u bë kurrë e tillë. Dikush nga “Turkish Airlines” nuk e donte kaq të madhe dhe krenare, por kishte të tjera qëllime.

Më pas, dikush tjetër që administroi kompaninë për shumë vite në Shqipëri si Sinan Bilek, firmosi dhe rëndoi gjendjen ekonomike dhe borxhet e kompanisë. Bilancet e saj shfaqeshin në media, ndërkohë që në QKB nuk i gjente askush. Shifra që lëviznin e që aksionerët nuk i dinin, por sulmet vazhdonin.

A ishte qëllimi të sulmohej Sinan Idrizi? Askush nuk e beson këtë. Ai është minorancë në kompani, dikush tjetër është aksioneri kryesor dhe ai është “Turkish Airlines”.

Qëllimi i sulmit ndaj “Air Albania”-s ka një perde tjetër.

Duket si një vrasje me paramendim e ngelur në tentativë, të paktën deri në këto momente. Sepse pasioni për ta ekzekutuar nuk ndalet. “Air Albania”-s iu premtuan 7 avionë, nuk i pati kurrë kaq. Për më tepër, aksioneri kryesor, “Turkish Airlines”, nuk i dha fondet, përveç 2 avionëve që tani nuk janë.

Si mund të shkëlqente “Air Albania” pa financimin dhe mbështetjen e “Turkish Airlines”, pa një flotë të plotë, që ta bënte atë konkurrente, përballë “low cost”-eve të pretenduara që fluturojnë nga Rinasi?

Mund të jenë të gjithë bashkë, mund të jenë disa, por “Turkish Airlines” deri tani duket faktori kryesor i dëshirës për të “vrarë” “Air Albania”-n, që nga fakti që nuk financoi siç duhet, që nga fakti që kurrë nuk dha të gjithë flotën, që nga fakti se CEO i emëruar prej saj, Sinan Dilek, firmosi dhe pranoi fatura të firmosura me kosto të fryra, duke rënduar borxhin e kompanisë, kjo u provua edhe në Gjykatën e Lartë në Shqipëri. Që nga fakti që “Air Albania” nuk i ka bilancet, por ato dalin në publik. Që nga fakti që dalin gjyqe dhe procese, që lidhen direkt me “Turkish Airlines”, për të cilat akuzohet “Air Albania”.

Jo pa qëllim, gjithçka i faturohet kësaj të fundit. Vazhdon dëshira dhe paramendimi për ta “vrarë” “Air Albania”-n.

Ky është qëllimi dhe ai justifikon edhe mjetin, jo më kot përdoren dhe u përmendën më lart, të gjitha mjetet kanë një qëllim: “vrasjen” e “Air Albania”-s.

Kjo kompani duhet të ishte krenari për shqiptarët, mban flamurin e tyre dhe e çon atë në çdo portë ajrore europiane, pse jo dhe përtej. Aksionerët shqiptarë duhet të marrin në dorë fatet e kësaj kompanie sepse nuk është thjesht një nga të shumtat kompani të fluturimeve që del me humbje, me dhjetëra apo me qindra milionë, nuk është as e para e as e fundit që ka vështirësi financiare, që anulon udhëtimin apo që i vonohet udhëtimi. Gjithçka mund të kalohet kur ka vullnet dhe jo thika pas shpine.

Këtu duhet të ndërhyjë edhe qeveria shqiptare dhe ajo turke që kompania “Air Albania”, e cila ka flamurin e Shqipërisë në bisht dhe “AIR ALBANIA” në trupin e saj, të fluturojë e lirë, krenare dhe konkurrente në treg. Dhe jo t’i krijohen të tilla pusi, për ta “vrarë” në kurth./CNA

Policia ka dhënë një informacion paraprak në lidhje me atentatin e ndodhur në Shkodër.

Sipas njoftimit të policisë, R. G. ka qëlluar me armë zjarri dhe si pasojë kanë humbur jetën dy persona dhe dy të tjerë janë të plagosur. 

Një nga viktimat, Armando Pali, ka ndëruar jetë në vendngjarje, ndërsa viktima tjetër, L. K.(L) ka ndërruar jetë në spitalin e Shkodrës.

Të plagosur kanë mbetur 43-vjeçari Erogen Vaso Brajoviç dhe një 25-vjeçare, M. K.

Gjithashtu policia njofton se është sekuestruar një armë zjarri automatike gjatë arrestimit të autorit të dyshuar.

Njoftimi i policisë

Shkodër / Informacion paraprak

Rreth orës 08:50, në lagjen “Qemal Stafa”, në ambientet e jashtme të një lokali, dyshohet se shtetasi R. G. ka qëlluar me armë zjarri dhe si pasojë janë plagosur shtetasi E. V. (B.), 43 vjeç, i cili ndodhet nën kujdesin e mjekëve, si dhe shtetasja M. K., 25 vjeçe, e cila është dëmtuar lehtë.

Gjithashtu, si pasojë e të shtënave, ka humbur jetën në vendngjarje shtetasi A. P., ndërsa në Spitalin Rajonal Shkodër ka ndërruar jetë edhe shtetasi L. K. (L.), 31 vjeç.

Shërbimet e Policisë kanë shkuar menjëherë në vendngjarje dhe janë vënë në ndjekje të autorit. Pas disa minutash ndjekjeje, bënë të mundur kapjen e tij dhe sekuestruan një armë zjarri automatike.

Ndërkaq, grupi hetimor, nën drejtimin e Prokurorisë, vijon punën për zbardhjen e rrethanave të ngjarjes.

 

Një mega operacion u zhvillua në orët e para të mëngjesit në Qarkun e Elbasanit.

Mësohet se operacioni nuk u zhvillua vetëm në zonat pranë qytetit, por u shtri në disa qytete të këtij qarku, përfshirë Prrenjasin, Librazhdin, Gramshin, Peqinin, Cërrikun, Belshin dhe Elbasanin.

Aksioni rezultoi në arrestimin e 40 personave të dyshuar për përfshirje në aktivitet kriminal.

Gjatë kontrolleve të ushtruara nga forcat e Policisë së Shtetit, u sekuestruan tre armë zjarri të tipit kallashnikov, disa pistoleta, si dhe sasi të konsiderueshme lëndësh narkotike./CNA

Këtë të hënë, në Tiranë nis Konferenca e Ambasadorëve Diplo2025, “Shqipëria 2030: në Europë, e ndërlidhur me botën”.

Në këtë konferencë, që zhvillohet nga 8-10 shtator, do të mirëpriten ambasadorë nga e gjithë bota dhe ekspertë vendas e ndërkombëtarë.

Fokusi i diksutimeve është rrugëtimi europian i Shqipërisë, diplomacia ekonomike dhe siguria rajonale e globale.

Konferenca do të jetë e ndarë në tri panele. Pjesë e konferencës do të jetë edhe kryeministri Edi Rama, si edhe ambasadori i BE-së në Shqipëri, Silvio Gonzato.

Agjenda e plotë e konferencës përmban detajet mbi të pranishmit, tematikat e diskutimit dhe të tjera informacione mbi aktivitetin, si më poshtë./CNA

Ditën e sotme, 8 shtator, nis viti i ri shkollor 2025-2026.

Në bankat e të gjitha shkollave në vend do të ulen rreth 345 mijë nxënës, prej të cilëve 26.500 ulen për herë të parë.

Në procesin mësimor të këtij viti shkollor do të përfshihen rreth 31 mijë mësues.

Disa ditë më parë, Ministria e Arsimit publikoi Kodin e Etikës që duhet të ndjekin mësuesit, si dhe rregullat e reja për nxënësit.

Këtë vit të ri shkollor, sipas Ministrisë së Arsimit, janë shpërndarë tekste falas për 236 mijë nxënës./ CNA