Përkujtohet Ismail Qemali, Babai i kombit shqiptar

24 Janar 2025, 14:48, Kulturë CNA

Këtë të premte në qytetin e Vlorës është përkujtuar 181-vjetori i lindjes dhe 106-vjetori i ndarjes nga jeta të themeluesit të shtetit shqiptar, Ismail Qemalit.

Babai i kombit dhe kryeministri i parë shqiptar, Ismail Qemali, u nda nga jeta më 24 janar 1919 në hotelin “Brufani” të Peruxhias.

Përkujtohet Ismail Qemali, Babai i kombit shqiptar

Ceremonia është organizuar nga Bashkia Vlorë ku janë vendosur edhe kurora me lule dhe janë kryer homazhe te varri monumental në Sheshin e Flamurit.

I pranishëm në ceremoni ishte edhe kryebashkiaku Ermal Dredha, Prefekti i Qarkut, Plator Nesturi, si dhe përfaqësues të Universitetit të Vlorës që mban emrin e themeluesit të shtetit shqiptar.

Autoritet kanë vendosur kurora me lule në nderim të figurës së Ismail Qemalit.

Përkujtohet Ismail Qemali, Babai i kombit shqiptar

Kryebashkiaku Dredha dhe prefekti Nesturi e kanë quajtur ditën e sotme më shumë se një nderim për Babain e kombit.

Ismail Qemali, që nga 12 shkurti 1919 prehet në oborrin e teqesë në Kaninë.

Kush ishte Ismail Qemali

Pasi kreu shkollën fillore në qytetin e lindjes në Kaninë dhe gjimnazin “Zosimea” në Janinë, më 1859 u vendos me familjen e tij në Stamboll, ku u aktivizua në lëvizjen patriotike shqiptare mori pjesë në përpjekjet për caktimin e një alfabeti të përbashkët të gjuhës shqipe dhe për formimin e një shoqërie kulturore shqiptare.

Në Perandorinë Osmane pati funksione të rëndësishme administrative dhe u shqua shumë shpejt si personalitet me pikëpamje liberale.

Mori pjesë aktive në lëvizjen xhonturke, në krahun përparimtar të saj që ishte për njohjen e të drejtave të kombeve të Perandorisë dhe u hodh kundër xhonturqve kur këta morën pushtetin dhe vendosën diktaturën ushtarake.

U dallua si frymëzues dhe organizator i kryengritjeve antiosmane të viteve 1910-1912. Së bashku me Luigj Gurakuqin e patriotë të tjerë hartoi memorandumin e Greçës të qershorit 1911 dhe në fund të atij viti mori nismën për organizimin e kryengritjes së përgjithshme të 1912.

I ngarkuar nga rrethet patriotike të vendit shkoi në Stamboll për ta bindur qeverinë osmane t’u jepte shqiptarëve autonominë.

Pas fillimit të Luftës së Parë Ballkanike ndërmori së bashku me Luigj Gurakuqin një aksion të ri politik për të shpëtuar atdheun.

Në mbledhjen e Bukureshtit më 5 nëntor 1912 gjeti përkrahjen e kolonisë shqiptare të atjeshme dhe prej andej shkoi në Vjenë ku u takua me personalitete politike austro-hungareze dhe me përfaqësues diplomatikë të Fuqive për të shtruar e mbrojtur çështjen shqiptare.

Më 19 nëntor 1912 njoftoi në atdhe se do të shpallej pavarësia nga Kuvendi Kombëtar që do të mblidhej për të vendosur mbi të ardhmen e vendit. U kthye me bashkëpunëtorët e tij në Shqipëri. Në Vlorë kryesoi mbledhjen e Kuvendit Kombëtar që shpalli Pavarësinë e Shqipërisë më 28 Nëntor 1912./CNA