Në burg për trafikim droge/ Avokati i kryekomisarit: Pasho s'dinte gjë për kanabisin

3 Dhjetor 2023, 10:43, Kronika CNA

Në burg për trafikim droge/ Avokati i kryekomisarit: Pasho

Gjykata caktoi këtë të dielë masën e sigurisë “arrest me burg” për Stiljan Pashon, ish-Shefi i Sektorit të Kufirit, në Drejtorinë Vendore për Kufirin dhe Migracionin Korçë.

Ky vendim është kundërshtuar nga avokati mbrojtës i Stiljan Pashos, Nevzat Tarelli, i cili pretendon se prokuroria nuk ka prova të mjaftueshme për përfshirjen e ish-zyrtarit të policisë në trafikimin e drogës.

Sipas mbrojtjes, Pasho ka udhëtuar rastësisht nga Korça në drejtim të doganës të Kapshticës me personin, i cili u arrestua në Greqi për transportin e 27 kg të lëndëve narkotike.

Ai tha se Pasho nuk ka patur dijeni për lëndën narkotike që ndodhej në mjet, ndonëse ka favorizuar Lorenc Likën për të kaluar pa radhë në doganë.

“Gjykata ka vendosur vlerësimin e ligjshëm të ndalimit të urdhëruar nga prokuroria dhe ka caktuar masën e sigurimit personal arrest me burg nën dyshimin e kryerjes së veprës penale të trafikimit të lëndëve narkotike në bashkëpunim. Në vlerësimin tim nuk kishte prova të mjaftueshme, ndaj dhe ka zgjatur seanca sepse është debatuar mjaftueshmërisht sa në aspektin praktik të provave aq edhe në aspektin teorik të formulimit të akuzës, në rastin konkret ka një tejkalim të logjikës së dyshimit të arsyeshëm për këtë vepër penale. Që kjo vepër penale të ekzistojë duhet domosdoshmërisht që ai të kishte dijeni që subjekti që dyshohet se ka trafikuar lëndë narkotike, ka pasur lëndën në makinë, dyshim që është thjesht i supozuar dhe jo e mbështetur në provë. Jo çdo veprim në kundërshtim me ligjin mund të çojë në veprën penale të trafikimit sepse ai mund të jetë një veprim i pakujdesshëm apo në tejkalim të kompetencave, një veprim për të shmangur një radhë apo për t'i krijuar një procedurë të lehtësuar, por që të ekzistojë trafikimi në bashkëpunim do të duhet që kryekomisari të kishte dijeni për lëndën narkotike, gjë që nuk më rezulton në asnjë akt, s'ka pasur asnjë njohje, lidhje apo komunikim që ngre këtë dyshim në këtë nivel. Jo vetëm që ka mohuar dijeninë për ekzistencën e lëndës narkotike, por në gjendje totalisht emotive, i mohon dhe nuk e pranon dot pasi nuk e ka menduar kurrë diçka të tillë. Ka sqaruar pozitën e tij, ka shkuar në doganë me atë mjet si mjet i rastësishëm udhëtimi, dhe në këto rrethana subjektit i është krijuar një lloj privilegji për të mos qëndruar gjatë në radhë. Edhe kjo ka qenë temë e diskutueshme, dyshimin prokuroria e bën hipotetik dhe niset nga fakti që këto subjekte të proceduara kanë kaluar edhe herë të tjera në Greqi. Ka vetëm një rast në maj, nga dogana ka shkuar në Kostur me një shtetas që është në procedim ose që dyshohet, ka marrë disa ilaçe për nënën e tij të sëmurë dhe është kthyer prapë ndërkohë që personi ka pasur destinacionin e tij për në Selanik, pra një mjet i radhës që është ndodhur. Në rastin konkret Stiljan Pasho ka ardhur nga Korça deri në doganë me këtë shtetas, i cili është vendosur në radhë për të dalë, ka vijuar puna me mjetet e tjera, dhe në një moment ky person është favorizuar për të kaluar pa radhë në doganë. Unë po shkoj në nivel më të lartë se shpërdorimi i detyrës, sepse sjellja e tij nuk është korrekte në raport me kodin e etikës dhe mund të ishte shkak për procedim disiplinor, që është ezauruar në këto momente me përjashtim nga drejtoria e përgjithshme e policisë, e bërë mediatike sepse ne nuk na është komunikuar ende zyrtarisht. Kjo është çështje për t'u provuar në fund nëse është shpërdorim detyre apo tjetër nivel”, deklaroi avokati./ CNA