E fundit!

11:47 Aktualitet

Video/ Bllokohet lëvizja në sheshin "Skënderbej", qytetarët të revoltuar, debatojnë me efektivët

Ditën e sotme në sheshin “Skënderbej” është zhvilluar fest...

Merret vendimi/ “Ufo-ja i Tiranës” nuk do të ekstradohet drejt Italisë

29 Mars 2023, 11:51, Kronika CNA

Merret vendimi/ “Ufo-ja i Tiranës” nuk do të ekstradohet

Ilir Paja

Ilir Paja, i njohur ndryshe me nofkën "Ufo i Tiranës" nuk do të ekstradohet drejt Italisë. Mësohet se pjesën tjetër të dënimit, prej 24 vitesh e 8 muajsh, do ta shlyejë në Shqipëri.

Ndaj 49-vjeçarit rëndojnë një sërë akuzash, që nga vrasja, deri te dy arratisjet e tij spektakolare nga paraburgimi.

Më parë ai u arrestua për “plagosje të rëndë me dashje” të policit Blendi Haxhimiali, gjatë operacionit për arrestimin e tij, në mars 2008, në Tiranë, por në 2017-ën gjykata e Krujës e la të lirë.

Në Itali shqiptari akuzohet për “vrasje me dashje të mbetur në tentativë në bashkëpunim”, “rrëmbim dhe mbajtje peng të personit” dhe “marrëdhënie seksuale me dhunë me të mitura”.

Edhe në Gjermani shqiptari rezulton me precedentë penalë, pasi akuzohej për vrasjen e një shqiptari tjetër në Duisburg.

Ndonëse ai u arrestua në Itali, pas disa muajsh dënim, në qershorin e 2006-ës, ai ka mundur të arratiset nga paraburgimi i Perugia-s, duke përdorur çarçafët si litar, deri në arrestimin e tij të dytë, më 4 shtator 2006.

Ai u ndalua në Itali dhe ndaj tij u shtua edhe akuza për shfrytëzim prostitucioni. Por ai ka mundur të ikë sërish nga burgu, në 14 gusht të 2007-ës, ndërsa policia ishte duke e transportuar me ambulancë, për shkak se i dënuari ishte në gjendje shumë të rëndë psikologjike dhe kishte tentuar disa herë vetëvrasjen.

Kësaj here kishte bërë si i sëmurë psikik dhe kur e kishin transportuar me ambulancë kishte filluar të rënkonte e të tërhiqte vëmendjen e policit kryesor. Kur ky është afruar, Paja i ka qëlluar me grusht në fytyrë. Më pas ka hapur derën e autoambulancës dhe është larguar me vrap, ku ka kapërcyer një mur të lartë dhe ka ndjekur linjën e trenit. Edhe pse policët kanë qëlluar në ajër, nuk ka ndaluar. Më pas është futur në një pyll dhe është zhdukur. Pas arratisjes së dytë në Itali, Ilir Paja është kthyer në Tiranë, ku jetonte i fshehur dhe është arrestuar sërish.

Këtu theksojmë se Paja u akuzua si autori i vrasjes së një shtetasi nga Ekuadori dhe plagosjes së një tjetri, pas një grindjeje që kishte për motiv ngacmimin e një femre ekuadoriane, në kohën që ajo ishte me bashkëshortin e saj. Një tjetër episod i rëndë, sipas akuzës, ishte ai i dhunimit seksual të një 19-vjeçareje rumune./ CNA.al