28 vjet nga tragjedia e Prespës/ Familjarët kërkojnë drejtësi!

8 Maj 2024, 19:30, Kronika CNA

13 nxënës së bashku me mësuesin e tyre, nga fshati Starovë i Pogradecit humbën jetën tragjikisht në liqenin e Prespës 28 vite më parë. Të gjithë lundronin në një varkë të vetme, kur u përmbysën në ujërat e liqenit dhe u shuan përgjithmonë. Edhe pas kaq shumë viteve, familjarët e fëmijëve ngrenë akuza se nuk ka patur drejtësi për këtë tragjedi të ndodhur. Hava Latollari tregon se varkaxhiu është dënuar me vetëm 8 muaj burg e më pas u la i lirë.

"28 vite më parë ka ndodhur kjo tragjedi. Ne kishim djalin, Arti Latollarin, e dërguam në mëngjes se ky ishte program mësimor, nuk i dërguam për qejfin tonë por kishte 1 muaj që thanë do shkojnë në ekskursion në Voskopojë, por më pas u ndërrua se vinte Sali Berisha në takim atje dhe u çuan në Prespë. Ndodhi ajo që ndodhi, na shkurtuan në mes ne se ishte faji i njerëzve atje, jo i fëmijëve që vajtën. Atë të destinacionit ata e hoqën fare, i grisën ato karta, ne jemi ngritur në atë kohë se edhe varkat që kishin nuk kishin benzinë. Ata nuk u morën me këtë tragjedi, ishin 14 veta, nuk kanë vënë dorë dhe tani kërkojmë drejtësi. Në atë kohë e dënuan 8 muaj dhe e kanë nxjerrë atë të varkës. Nuk na dhanë drejtësi, kudo që kemi kërkuar po t’i shikosh janë shumë karta dhe ata ja hedhin topin njëri tjetrit. Ne kërkojmë drejtësi sepse vetëm ne qajmë për ata, nuk qan njeri tjetër dhe nuk duam të qajnë ama të drejtën tonë të na i japin. Nuk kemi shpresë hiç, ata po hanë kokat e tyre dhe duhet të jenë brenda të gjithë ata që kanë futur për fëmijët tanë dorën në xhep", u shpreh Hava Latollari.

28 vjet nga tragjedia e Prespës/ Familjarët kërkojnë

Hava Latollari

Shpresa Berberi dhe Nurie Muçollari janë nënat e dy prej fëmijëve që humbën jetën në atë tragjedi. Dy nëna që u digjet shpirti nga humbja e fëmijëve, ndërsa janë të vetmet që i kujtojnë me lot çdo 7 Maj. Askujt tjetër nuk u bie ndërmend për ngjarjen e rëndë të ndodhur 28 vite më parë dhe duket se askush nuk bëri drejtësi për ta.

“Çupën e kisha 15 vjeçe, unë nuk e dërgova me dëshirë, ma morën pa pyetur fare. Unë e prisja të vinte në shtëpi, si e morën pa pyetur nënën e babanë. E mora vesh kur buçiste fshati, në mëngjes e mora vesh ç’kishte ndodhur. Një thoshte i ka marrë autobusi i ka çuar në Itali, një tjetër më thoshte është mbytur. Ne nuk na del jo 28 vjet por deri sa të na tresë dheu. I rritëm me zor, i rritëm me bukë prej misri, pa këpucë. Çupa ime ka ikur pa asnjë lek. Të gjithë s’besojmë për drejtësi, ata janë të gjithë njësoj. Nuk është gjynah të kërkojmë shpirtin e fëmijëve ne?”, deklaroi Shpresa Berberi

Ndërsa Nurie Muçollari tha: “Na thanë që do shkojmë në Voskopojë, i thashë çdo kërkosh andej moj çupë? Lëre që nuk kishim as lekë, por më tha mami unë do iki që mos ndahem nga shoqet. I kam dhënë 2 mijë lekë, unë ika në Pogradec kur u ktheva nuk e gjeta çupën. Prit të vinte çupa, ajo s’po vinte. Në atë kohë vjen aeroplani, kur na kujtohet ajo skenë... 13-14 vjeç çupë e mori perëndia. Drejtësi s’ka patur fare, ne i dimë se ishin të sigurt se i dërguam në shkollë megjithatë ne u kemi rënë mbrapa shumë”.

Në atë kohë kur ndodhi tragjedia, kërkimet sipas Hava Latollarit kanë nisur 1 ditë pas ngjarjes për të gjetur trupat e mbytur. Ajo e konsideron një angazhim minimal të instancave, pasi trupat e pajetë duhet të nxirreshin më parë nga ujërat e liqenit.

"Kur shkuam atje ne nuk kishte absolutisht asnjë njeri hiç. Liqeni flinte, ishte i qetë, kur vajtëm ne të parët atje filluan të vinin edhe makina të tjera. U nxi qielli nga aeroplani, prandaj na vjen inat ne që jemi në këtë Shqipëri dhe me këto qeveri", theksoi ajo.

Në kujtim të 14 ëngjëjve, shkolla e fshatit Starovë ka marrë emrin e tyre. Brenda kësaj shkolle ndodhet edhe një klasë muze që paraqet këta fëmijë dhe mësuesin që humbën jetën tragjikisht në atë që do të ishte ekskursion shkollor, ndërsa familjet edhe sot e kësaj dite presin drejtësi./ CNA