S’e mohoi kurrë origjinën arvanitase/ Ish-ministri Pangalos prezantoi në 2018 librin e tij në Tiranë

31 Maj 2023, 20:28, Kosova & Bota CNA

S’e mohoi kurrë origjinën arvanitase/ Ish-ministri Pangalos

Theodoros Pangalos, ish-ministër i Jashtëm i Greqisë

Theodoros Pangalos, ish-ministri i Jashtëm i Greqisë që u nda sot nga jeta, është një nga politikanët që nuk e ka mohuar kurrë origjinën arvanitase.

Për 4 vite, nga 1996-ta deri në 1999-ën ai shërbeu si Ministër i Punëve të Jashtme të Greqisë. Eksperiencën e tij ai e rrëfeu në librin “Me Papandreun në Europë”.

Ky libër, i përkthyer edhe në gjuhën shqipe, u prezantua në Tiranë në maj të 2018-ës. Në prezantimin e librit në kryeqytet, ishte prezent vetë politikani grek dhe ish-presidenti Ilir Meta.

“Me Papandreun në Europë” u përkthyer nga Kristaq Pulla. Në libër, zbulohen negociatat që ka kryer Greqia për anëtarësimin e saj në vitin 1981 në Bashkimin Europian, dhe vështirësitë e hasura gjatë bisedimeve.

S’e mohoi kurrë origjinën arvanitase/ Ish-ministri Pangalos

Gjatë ceremonisë, ish-ministri i Jashtëm i Greqisë deklaroi se: “Libri flet për marrëdhëniet e mia me Andrea Papandreun gjatë kohës që kam qenë ministër i jashtëm. Ky libër është i vlefshëm për shqiptarët që do të fillojnë negociatat me europën, shpresoj të fillojnë sa më shpejt. Në kohën kur ne negocionim për t’u bashkuar me europën, zonja Theçer nuk e donte Andrean, e urrente atë dhe përpiqej ta pengonte në negociata, por edhe europianët bëjnë gabime”.

Theodoros Pangalos u ndal edhe te raportet me politikanët shqiptarë, duke përmendur veçanërisht takimin me ish-kryeministrin Sali Berisha.

“Zotit Berisha i kam thënë dy gjëra, për të cilat unë këmbëngulja shumë. Çështja e parë ishin piramidat dhe Berisha më akuzoi që isha dinak dhe sugjeroja të ndaloheshin piramidat qëllimisht që shqiptarët t’u drejtoheshin bankave greke. Çështja e dytë që i kërkova ishte të nxirrte nga burgu Fatos Nanon, më tha është e paligjshme, i propozova të nxirrte një ligj të posaçëm e ta nxirrte nga burgu. Kur e kam takuar shumë kohë më vonë Berishën më tha që kisha pasur të drejtë për të dyja rastet”, deklaroi ai.

Pangalos shtë një nga politikanët grekë që i ka ushtruar vëmendje të madhe marrëdhënieve me Shqipërinë.

Madje, për një vizitë në vendin tonë ai ka deklaruar se me shqiptarët jemi “një fytyrë, një racë”./ CNA.al