LEXO PA REKLAMA!

SHKARKO APP

Rusia propozoi stërvitje të përbashkët detare me Korenë e Veriut dhe Kinën 

4 Shtator 2023, 14:18, Kosova & Bota CNA

Rusia propozoi stërvitje të përbashkët detare me Korenë

Ministri rus i Mbrojtjes i propozoi udhëheqësit të Koresë së Veriut, Kim Jong-un, që vendet e tyre të zhvillojnë një stërvitje detare, së bashku me Kinën, njoftoi të hënën agjencia e lajmeve e Koresë së Jugut "Yonhap", duke cituar agjencinë e inteligjencës së Koresë së Jugut.

Sergei Shoigu vizitoi Korenë e Veriut për 70-vjetorin e përfundimit të luftës koreane, në korrik kur u takua me Kim Jong-un.

Ata morën pjesë në një ekspozitë të mbrojtjes që shfaq raketat balistike të ndaluara të Koresë së Veriut, raportuan mediat shtetërore të Koresë së Veriut në atë kohë, raporton "The Guardian".

"Yonhap" raportoi se Shoigu i kishte bërë propozimin për një stërvitje detare trepalëshe liderit të Koresë së Veriut gjatë vizitës së tij, por nuk dha detaje.

Shërbimi Informativ Kombëtar i Koresë së Jugut i tha Asamblesë Kombëtare se Shoigu duket se kishte mbajtur një takim privat me Kim për të rënë dakord për një zgjerim të gjerë ushtarak, raportoi "Yonhap".

Të shtunën, ambasadori rus në Korenë e Veriut, Alexander Matsegora, i tha agjencisë së lajmeve "Tass" se ai nuk ishte në dijeni të ndonjë plani që Koreja e Veriut të merrte pjesë në stërvitjet ushtarake trepalëshe me Kinën dhe Rusinë.

Por shtoi se sipas mendimit të tij do të ishte e përshtatshme në dritën e stërvitjeve të udhëhequra nga SHBA-ja në rajon.

Koreja e Veriut ka kryer gjashtë teste bërthamore që nga viti 2006 dhe ka testuar raketa të ndryshme gjatë viteve të fundit, por rrallëherë zhvillon stërvitje ushtarake me fqinjët e saj.

SHBA dhe aleati i saj, Koreja e Jugut, zhvillojnë stërvitje të rregullta ushtarake, të cilat Koreja e Veriut i denoncon si përgatitje për luftë kundër saj.

Lajmet e fundit nga