E fundit!

07:46 Ekonomi

Çmimet e konsumit në të gjithë Evropën/ Vendet më të shtrenjta dhe më të lira, ja ku renditet Shqipëria

Nga Islanda në Maqedoninë e Veriut, çmimet e konsumit ndry...

12 vite pa shkuar në Irak/ Erdogan bën vizitën historike, kërkon luftë kundër rebelëve kurdë

22 Prill 2024, 16:31, Kosova & Bota CNA

12 vite pa shkuar në Irak/ Erdogan bën vizitën historike,

Presidenti turk Rexhep Tajip Erdogan dhe Abdul Latif Rashid

Presidenti turk Rexhep Tajip Erdogan u takua me homologun e tij, Abdul Latif Rashid në Bagdad, ku ndodhet për një vizitë zyrtare.

Analistët politikë në Turqi e cilësuan si historike vizitën e presidentit Erdogan, i cili vizitoi Bagdadin për herë të fundit 12 vjet më parë. Informacionet bëjnë me dije se gjatë qëndrimit të presidentit turk në kryeqytetin irakian do të nënshkruhen mbi 20 marrëveshje.

Pala turke i kushton rëndësi të veçantë dy marrëveshjeve: E para ka të bëjë me përgjigjen e përbashkët ushtarake ndaj rebelëve kurdë të PKK-së, të cilët përdorin Irakun e Veriut si bazën e tyre. Turqia dhe vetë presidenti Erdogan kanë njoftuar se brenda verës do të ketë një operacion të madh të ushtrisë turke në Irakun e Veriut për të pastruar zonën nga PKK dhe në këtë drejtim Ankaraja kërkon bashkëpunimin e Bagdadit.

Çështja e dytë e rëndësishme që kërkon Turqia nga Iraku është nënshkrimi i një marrëveshjeje për krijimin e aksit rrugor të planifikuar nga Ankaraja që do të lidhë Gjirin Persik me Turqinë, duke krijuar një aks transporti alternativ dhe konkurrues ndaj aksit të planifikuar tregtar detar dhe hekurudhor, i cili do të fillojë nga India dhe përmes Gadishullit Arabik dhe Izraeli, do të përfundojë në Mesdhe dhe prej andej në portet e Greqisë dhe Italisë.

Për Irakun me mungesë uji, nënshkrimi i një marrëveshjeje për furnizimin me ujë nga Turqia ka një rëndësi të madhe.

Takimi u mbajt me dyer të mbyllura dhe u dhanë pak detaje për përmbajtjen e bisedimeve. Sipas Drejtorisë së Komunikimit të Presidencës turke, gjuha kurde dhe gjendja e turkmanëve në Irakun e Veriut ishin ndër çështjet kryesore të ngritura nga Rexhep Tajip Erdogan.

Presidenti Erdogan tha se hapat e ndërmarrë nga Turqia dhe Iraku në periudhën e ardhshme së bashku do të kontribuojnë në zhvillimin dhe prosperitetin rajonal.

Presidenti Erdogan deklaroi gjithashtu se përpjekjet për të ndaluar shtypjen izraelite në Gaza vazhdojnë dhe se vendet islamike duhet të veprojnë të bashkuara në këtë proces./ CNA