LEXO PA REKLAMA!

SHKARKO APP

App Store
Google Play

Fasha 800 kWh, mes debatesh politike dhe kuletës së varfër të qytetarëve

31 Dhjetor 2022, 15:40, Ekonomi CNA
Fasha 800 kWh, mes debatesh politike dhe kuletës së varfër
Foto ilustruese

Lufta e Rusisë në Ukrainë pati një ndikim në mbarë botën, duke sjellë kriza të mëdha si ekonomike, edhe energjie.

Nga këto kriza është prekur edhe Shqipëria. Për të përballuar krizën, kryeministri Edi Rama lajmëroi në Kongresin e PS-së që u mbaj më 9 prill se do të rriste çmimin e energjisë për një fashë të konsumatorëve. Më pas, qeveria prezantoi fashën kufizuese.

Enti Rregullator i Energjisë vendosi që abonentët familjarë, të cilët harxhojnë më shumë se 800 kWh do të paguanin 42 lekë për kWh, së bashku me TVSH-në.

Ky çmim ishte parashikuar të aplikohej në 1 tetor, por më 30 shtator kryeministri Edi Rama njoftoi në rrjetet sociale se fasha do të anulohej.

CNA.al ka raportuar më parë se ky vendim erdhi për shkak të reshjeve të shiut dy-tri ditët para hyrjes së muaj tetor, që sipas Ramës kishin rritur prurjet në hidrocentralin e Fierzës.

“Një lajm pozitiv edhe pse nuk do të hyjë në fuqi në tetor fasha 800 kWh për konsumatorët familjarë. Më 1 shtator, kur ne vendosëm fashën, kërkesa për energji ishte shumë e lartë, por tashmë është ulur. Rol të rëndësishëm ka edhe fillimi i dukshëm i qasjes së familjarëve për të kursyer energjinë. Përmirësim kemi pasur dhe në nivelin e Fierzës. Përmirësim pritet të ketë edhe në ditët në vijim. Kjo na bëri që të vendosim që nga 1 tetori të mos hyjë në fuqi kjo fashë”, tha kreu i qeverisë ndër të tjera.

Por opozita e konsideroi anulimin e fashës së energjisë si tërheqje nga frika e humbjes së pushtetit për shkak të nisjes së protestave të opozitës.

E njëjta gjë ndodhi edhe në nëntor. Kreu i Grupit Parlamentar të PS, Taulant Balla, njoftoi se Qeveria kishte vendosur të anulonte aplikimin e kësaj fashe për shkak të miradministrimit dhe ndërgjegjësimit të qytetarëve për kursimin e energjisë.

“Shtyrjen edhe për muajin nëntor, edhe pse shi s’ka pasur asnjë pikë, qeveria e ka vendosur për shkak të miradministrimit dhe ndërgjegjes së qytetarëve shqiptarë që kanë dhënë efektet e para të uljes së shpenzimeve të energjisë. Jemi ndër vendet e vetme, ku qeveria vazhdon të subvencionojë 80% të faturës. Nuk është e vërtetë. Është një opsion, por qeveria ka njoftuar në kohë Entin Rregullator se nuk do aplikohet”, deklaroi Balla.

Muaji dhjetor erdhi me reshje të dendura shiu. Këto reshje shkaktuan përmbytje në veri, si dhe rritën nivelin e kaskadave në vend.

Duke marrë shkas nga kjo situatë, Qeveria anuloi sërish rritjen e çmimit të energjisë për fashën 800 kWh.

Në një dalje publike kryeministri tha se: “Në kushtet kur kemi pasur reshje asnjëherë të mjaftueshme për hir të së vërtetës, nuk jemi në drejtim të vendosjes së fashës për muajin dhjetor”.

Ndërkaq, për vitin që vjen OSHEE nuk ka depozituar një aplikim të ri, çka do të thotë se tarifimi për vitin 2023 do të kryhet me një fashë./ B.A. – CNA.al

Lajmet e fundit nga