Banka e Shqipërisë nuk ndryshon normën e interesit/ Sejko: Si do të jetë inflacioni në 2023

1 Shkurt 2023, 16:52, Ekonomi CNA

Banka e Shqipërisë nuk ndryshon normën e interesit/ Sejko: Si do

Këshilli Mbikëqyrës i Bankës së Shqipërisë vendosi në mbledhjen e sotme të mbajë të pandryshuar normën bazë të interesit në 2.75%.

Këtë fakt e ka bërë të ditur guvernatori i Bankës së Shqipërisë, Gent Sejko, i cili pasqyroi situatën ekonomike në një deklaratë për mediat.

Sejko tha se inflacioni i çmimeve të konsumit shënoi rritje të lehtë në muajin tetor dhe reduktim të moderuar në muajin nëntor.

Ai parashikoi ulje graduale të inflacionit përgjatë vitit 2023 dhe sipas tij inflacioni pritet të shkojë në objektiv vitin pasardhës.

“Këshilli Mbikëqyrës konstatoi se efekti i goditjes së huaj vijon të jetë prezent në ekonominë shqiptare. Megjithatë, trajektorja e inflacionit duket se ka shënuar një kthesë drejt reduktimit në tremujorin e katërt, ndërsa aktiviteti ekonomik vijon të jetë nën presionin e çmimeve të rritura dhe të pasigurisë së shtuar.

Përditësimi i parashikimeve për të ardhmen sugjeron se inflacioni do të kthehet në objektiv në gjysmën e parë të vitit 2024. Po ashtu, ekonomia shqiptare pritet të rritet në të ardhmen, ndonëse ritmi i rritjes pritet të vijë në ngadalësim në afatin e shkurtër dhe të rritet drejt potencialit në afatin e mesëm.

Këshilli Mbikëqyrës vlerësoi se normalizimi i deritanishëm i qëndrimit të politikës monetare ka kontribuuar në zbutjen e presioneve inflacioniste, nëpërmjet kontrollit të pritjeve për inflacionin, reduktimit të pasigurisë dhe ruajtjes së stabilitetit në tregjet financiare, si dhe garantimit të qëndrueshmërisë së monedhës tonë kombëtare.

Mbështetur në këto konsiderata, në mbledhjen e sotme, Këshilli Mbikëqyrës vendosi të mos ndryshojë qëndrimin e politikës monetare. Ky vendim faktorizon reduktimin e inflacionit brenda dhe jashtë vendit në muajin nëntor, si dhe na mundëson një rivlerësim të shpejtësisë së normalizimit të qëndrimit të politikës monetare, në funksion të respektimit të objektivit të stabilitetit të çmimeve dhe të ruajtjes së ritmeve pozitive të rritjes ekonomike” deklaroi guvernatori i BSH-së ndër të tjera./ B.A. – CNA.al