Kur zonat ndahen si në mazhoritar dhe fushata bëhet si në proporcional rajonal, fitojnë ministrat

17 Maj 2025, 13:22, Editorial CNA

Kur zonat ndahen si në mazhoritar dhe fushata bëhet si në

Në nisje të fushatës u vu re që Partia Socialiste dhe Partia Demokratike përcaktuan zonat në të cilat do të punonin kandidatët.
Menjëherë pas listave u vu re edhe prania e 3 ministrave në listat e hapura të Partisë Socialiste në Tiranë. Të tre ministra me ministri me kapacitete të mëdha njerëzore dhe institucione vartësie e zyra në çdo cep të Tiranës dhe jo vetëm.
Si gjithë të tjerëve, edhe ministrave iu caktua territori ku duhej gërmuar vota preferenciale.

Fenomeni që shoqëroi votën preferenciale të Tiranës vlen të analizohet për rezultatin e votave preferenciale të Partisë Socialiste.
Nga ai rezultat 2 ministrat Ervin Hoxha dhe Blendi Gonxhja ishin surpriza edhe e komshinjve të të dyve.
Me ato shifra u duk qartë se Hoxha dhe Gonxhja duhet të kishin tharë jo vetëm kënetën e zonës së paracaktuar atyre, por të gjitha pellgjet e Tiranës.
Verifikimi i shifrave në sistemin e KQZ-së e dëshmon këtë.
Ministrat qartësisht kanë pirë ujë jo vetëm në çezmat e "shtëpisë" së vet, por me sa duket kanë tharë edhe rubinetat e të tjerëve.
Në nisje të fushatës, Pandeli Majko kishte deklaruar se nëse Rama do të ishte në listë të hapur ai do të refuzonte kandidimin.
Dhe deklarata e Pandit ishte e logjikshme.
Kush do të votonte në preferenciale Pandin, nëse kishte si zgjedhje Ramën!
Për të bindur elektoratin e PS-së për ta votuar atë në votë preferenciale, Rama nuk ka nevojë të trokasë derë më derë. Mjafton që njerëzit të hapin derën e frigoriferit në kuzhinë.
Por Pandi harroi ministrat dhe papjekurinë e tyre politike.
Ajo që ndodhi më pas është histori. Diku ministrat e etur u vërsulën çezmave, kopshteve e bahçeve të të gjithëve. Qindra patronazhistë me rrogë shteti në ministritë përkatëse u shpërndanë në të gjithë Tiranën, fshat e qytet.

Zonat u ndanë sipas modelit mazhoritar ku secili punonte tokën e vet, por të gjithë u vërsulën kudo për të mbledhur vota e për të bërë adetin si në proporcional rajonal. E në këtë shpërndarje fiton kush është më i madh, më i vjetër, më i pasur dhe mbi të gjitha kush ka më shumë njerëz që të mund t'u ndajë detyra në terren.
Ndaj nga Partia Socialiste fituan ministra pa elektorat, kurse nga Partia Demokratike lista udhëhiqet nga figura të gjithëpranuara.
Pandi e nisi mirë arsyetimin. Është koha ta çojë deri në fund./ CNA