Veliaj dirigjon Carlo Bollinon nga burgu: Intervistat më të gjata, të prodhohen materiale për portalet

8 Prill 2025, 20:20, Denoncim CNA

Veliaj dirigjon Carlo Bollinon nga burgu: Intervistat më të gjata,

CNA ka publikuar 13 faqe nga dosja e përgjimeve ndaj Veliajt, ku ka rezultuar se disa prej mediave dhe pronarët e tyre janë vënë nën shërbimin e kryebashkiaku për luftën mediatike ndaj prokurorëve dhe gjyqtarëve.

Një prej tyre është është Carlo Bollino i cili i ka vënë nën shërbim Veliajt Report Tv dhe Shqiptarja.com.

Në përgjimet e siguruara nga CNA, Veliaj bisedon herë me bashkëshorten e tij Ajola Xoxën dhe herë me të vëllain dhe kërkon që të flitet me Carlo Bollinon që intervistat për të jenë më të gjata dhe të prodhojnë materiale edhe për portalet.

Nga përgjimet tregohet qartë se si Carlo Bollino dhe mediat e tij janë vënë në dispozicion të një të burgosuri me tre vepra penale të rënda.

Përgjimet

Data 25.02.2025, në orën 11:59, Erion Veliaj bisedon me Arbrin, të cilit i kërkon që të flasë me Shqiptarja, me Temën, që çdo ditë të bëjë ndonjë intervistë dhe të prodhojnë materiale edhe për portalet. Në vijim i kërkon t'i thotë Karlos apo Mirës që nëse i bëjnë pesë pyetje, Erioni të kthen përgjigje, dhe në këtë formë çdo dy-tre ditë bëjnë intervista pak më të gjata, se nuk ka mjet tjetër për ta përballuar këtë gjë që po ndodh.

Data 06.03.2025, në orën 16:16, shtetasi Erion Veliaj bisedon me bashkëshorten e tij, Ajola Xoxa,të cilës ndër të tjera, i kërkon që të bisedojë me Karlon e ta pyesë nëse i ka marrë përgjigjet e tij për emisionin që do të zhvillohet sot. Ajola Xoxa e informon se nuk e ka numrin e Karlos, por Erioni e pyet “Po Albën, s'ke as Albën as Karlon”, Ajola i përgjigjet se numrin e Albës e ka dhe do ta pyesë. Erioni i thotë gjithashtu se numrin e Karlos mund t'ia japë edhe Renato.

Në orën 16:21,Erion Veliaj bisedon me vëllain e tij Arbërin, të cilit i kërkon që të pyesë Karlon nëse i ka marrë përgjigjet e tij për emisionin që do të zhvillohet sot në darkë. Në vijim të komunikimit, Arbëri i tregon se “kta shokët tanë” i kanë thënë që nesër do të zhvillohet konferenca me gazetarë. Erion Veliaj e orienton që takimi me gazetarët të bëhet me gazetarë normal, nga Top Channel, Report Tv, Tema, pa njoftim për shtyp që mos të vijnë gazetarët e Syrit apo MCN-ja. Erioni po kështu, i thotë që ata të bëjnë pyetje normale.

Në orën 16:22,Erion Veliaj bisedon me Ajolën dhe kjo e fundit i thotë se ka folur dhe i ka thënë e bëjnë gati me AI (inteligjencë artificiale). I kanë marrë përgjigjet dhe po e bëjnë gati. Po kështu, Ajola i tregon se e ka pyetur nëse do që të jape intervistë, por i ka thënë jo. Të njëjtën gjë i kërkon edhe Erioni, të rrijë sa më larg (nënkupton intervistës).