"Nuk deklaroj kundër vajzës sime"/ Si i manipulonte Veliaj dëshmitarët

6 Prill 2025, 17:00, Denoncim CNA

"Nuk deklaroj kundër vajzës sime"/ Si i manipulonte Veliaj

Përgjimet e publikuara nga CNA në lidhje me bisedat e kryebashkiakut të Tiranës, Erion Veliaj, me Ajola Xoxën dhe vëllanë e tij kanë nxjerrë në pah skandalin se si shantazhoheshin prokurorët dhe gjyqtarët përmes mediave apo lidhjeve të tij me biznesmenë të fuqishëm në vend siç është G. S.

Veliaj, po ashtu, që pas arrestimit të tij, përmes telefonatave me Xoxën dhe Arbrin, kërkon vazhdimisht të dërgojë njerëz te ministri i Drejtësisë, Ulsi Manja, që ai të mos transferohet në IEVP-në në Tiranë, të cilën e konsideron Alkatraz dhe flet për të me gjuhë fyese dhe kërcënuese.

Si të mos mjaftonte kjo, kryebashkiaku i Tiranës, Erion Veliaj, nga përgjimet rezulton se manipulonte dhe dëshmitarët, përfshirë vjehrrën e tij Valbona Xoxa, Greta Domin dhe dajën e Ajola Xoxës, Eraldi Simixhiun.

Në dosjen hetimore kjo ndërhyrje evidentohet si flagrante.

“Shumë 'flagrante' është ndërhyrja e të hetuarit në procesin hetimor, duke orientuar dëshmitarët e thirrur nga organi procedues. Në këtë rast i hetuari Veliaj i kërkon bashkëshortes së tij Ajola që ta inkurajojë Greta Domin dhe po kështu në lidhje me deklarimet e shtetasve Valbona Xoxa apo Eraldi Simixhiu. I tregon se si duhet të përgjigjen, ku ata të shprehen se nuk duan të japin deklarime dhe se kjo po shkatërron familjen”, thuhet në dosjen hetimore që CNA disponon.

Në orën 20:51, Ajola Xoxa bisedon me Erion Veliajn dhe i tregon se është e shqetësuar se të nesërmen duhet të paraqiten në Prokurori nëna e saj dhe daja Eraldi Simixhiu.

Erion Veliaj i tregon se po u bënë dy-tri pyetje ata duhet të thonë “Do të pyes avokatin dhe do t’ju them. Erdha vetëm për t’iu përgjigjur thirrjes, por nuk dëshmoj kundër vajzës, s’kam detyrim ligjor, kaq asigjë më shumë”.

Veliaj orienton Xoxën t’u thotë familjarëve që të mos thonë se u qëndrojnë deklarimeve sepse s’kanë çfarë deklarimesh t’u qëndrojnë.

“Nuk dua të dëshmoj, nuk dua të dëshmoj, po shkatërroni familjen e tërë”, bëhet e ditur të ketë thënë Veliaj në bisedën me Ajolën ku e mëson se si të orientojë dëshmitarët.

Më tej më 12 shkurt në orën 10:59 Veliaj bisedon me Ajolën ku flasin për mbledhjen e Grupit Parlamentar të Partisë Socialiste të kërkuar nga kryetarja e Komisionit të Ligjeve, Klotilda Bushka, kërkesë e pranuar nga kryeministri Rama, takimin që kishte pasur dëshmitarja Greta Domi me kryeministrin Rama.

Veliaj i kërkon Xoxës që të inkurajojë Greta Domin.

Në lidhje me mbledhjen e organizuar për të dëgjuar Bushkën, e cila rezulton e përfshirë në skemën "Veliaj-Xoxa", kryebashkiaku thotë se Rama i bëri të flisnin me vete (referuar prokurorëve dhe gjyqtarëve) madje mbrojti dhe Bushkën./ CNA