PËRGJIMET/ “U pastrua”, si u manipulua audioja e përballjes Veliaj-Dado

5 Prill 2025, 15:00, Denoncim CNA

PËRGJIMET/ “U pastrua”, si u manipulua audioja e

Në 24 shkurt të vitit 2025, kryebashkiaku Erion Veliaj hodhi akuza dhe pretendime që prokurori Ols Dado gjatë seancës në gjyq i ishte drejtuar atij me fjalën “ndyrësirë”.

Sipas Veliajt, në atë seancë gjyqësore ishte fyer, sulmuar e kërcënuar nga prokurori Ols Dado, me fjalë që, sipas kryebashkiakut, ishin të regjistruara dhe se kishte dëgjuar epitete të ndryshme ndaj tij si “gënjeshtar”, “je patologjik” e deri te fjala “ndyrësirë”.

Pas deklaratës së tij, mediat e dirigjuara nga ai nxituan të publikonin deklaratën e tij nga burgu i Durrësit, reagime të cilat duket se kryebashkiaku i ndiqte me ëndje nga burgu.

Këtë e vërtetojnë edhe përgjimet e bëra në burgun e Durrësit.

Po si qëndron e vërteta e asaj audioje të pretenduar nga Veliaj, që në fakt rezulton se është manipuluar dhe kjo tregohet shprehimisht nga vetë çifti Veliaj-Xoxa.

PËRGJIMET

Veliaj kërkon që Mero Baze, Maks Haxhia dhe të gjithë të tjerët të ngrihen dhe të kenë një reagim masiv në lidhje me deklaratën e tij për fjalën që pretendonte Veliaj se kishte thënë në seancë gjyqësore.

Më tej, në një bisedë të Veliajt me Ajola Xoxën, kjo e fundit tregon qartazi se po ndërhyhet në audio duke manipuluar të vërtetën. Ajo thotë se po punohet me transkriptin dhe po ashtu me audion për t’i pastruar zërin, ndërsa ky i fundit në telefonatën e radhës e pyet sërish nëse është pastruar audioja. Pra, qartazi tregohet dhe manipulimi që pretendohej të bëhej me audio.

“Në orën 15:20, gjatë bisedimit ndërmjet Erion Veliajt dhe Ajola Xoxës, ndër të tjera, Erioni i tregon se po shikonte lajmet në lidhje me postimin për fjalorin e ndyrë të përdorur nga ai (nënkupton prokurorin) dhe përgjigjen e atyre që e mohojnë (nënkupton Gjykatën e Posaçme) dhe e pyetën nëse do të nxjerrin audion që të provohet 100%.

Ajola i përgjigjet që do të pyesë çunat që e kanë nxjerrë audion. Për këtë gjë, Erion Veliaj i kërkon që të mos flasë direkt me ta pasi është në përgjim. Ajola i shprehet se e di këtë gjë. Erioni kërkon të dijë nëse do të publikohet audioja, dhe Ajola i thotë që do të flasë me avokatin se ai duhet të ketë transkriptimin. Erion Veliaj i thotë se do ta marrë sërish për pesë minuta, që të dijë në lidhje me veprimin e publikimit të audios, pasi është i shqetësuar që gjyqtari ka mbrojtur prokurorin, dhe i thotë Ajolës se duket qartazi që ata janë bashkë.

Në orën 15:33, Erion Veliaj telefonon Ajolën, dhe kjo e fundit i tregon se ata e kanë transkriptin dhe po punojnë me të, duke pastruar zërin, me qëllim që të dëgjohet mirë sepse është pak si nën zë, që të jetë e dëgjueshme. Erion Veliaj i kërkon të mos japë detaje në telefon, thjesht t'i thotë që po merret me këtë gjë.

Në orën 16:00, Erion Veliaj interesohet sërish në lidhje me transkriptimin dhe me pastrimin e audios së seancës gjyqësore, dhe Ajola në bisedë me të i konfirmon se kanë një përgjigje.

Erion Veliaj e pyet nëse e kane bërë transkriptimin e materialit, që t’ia çojnë redaktorit që ta shohë dhe i kërkon të takohet me të nga ora 12:00. I kërkon që materialin t'ia bëjë gati dhe t'ia japë redaktorit, i cili sipas bisedës, ka pasur takim me grupin”, thuhet në përgjime e siguruara nga CNA.

Kujtojmë se pati një reagim dhe nga SPAK-u dhe GJKKO-ja, ku hodhën poshtë deklaratat e Veliajt duke thënë se nuk është e vërtetë se prokurori Ols Dado i është drejtuar me fjalën “ndyrësirë”./ CNA