Bursat e nxënësve mbahen peng!/ Shefi i financës nuk njeh Ministrinë përgjegjëse

1 Qershor 2026, 21:08, Denoncim CNA

Bursat e nxënësve mbahen peng!/ Shefi i financës nuk njeh

Rasti i trajtuar këtë të hënë, më 1 qershor ka ndodhur në Vlorë, në lidhje me problemin e mosshpërndarjes së bursave për nxënësit e sistemit parauniversitar, si për ekselentët ashtu edhe për ata, që përfitojnë nga kriteri ekonomik.

Një nënë tregon, se kishte aplikuar për bursën e djalit të saj gjimnazist dhe, megjithëse rezultoi fitues që në shkurt 2026, pagesa nuk ishte dhënë ende, kur familja priste ato para për nevojat e fëmijës.

“Na thanë që ‘në xhepin tuaj këto lekë, një ditë do t’i merrni’. Pse të mos i marrim këto para brenda afateve?! Këto i duam në dispozicion të fëmijëve, t’u blejmë diçka atyre, sepse i kemi njoftuar fëmijët dhe ata presin e thonë: ‘Mami, i more ato lekët? Do më blesh atë apo këtë?’”, pohoi qytetarja.

Në Drejtorinë e Arsimit në Bashkinë Vlorë, përgjegjësja Fiona Çukani shpjegon, se ky institucion merret vetëm me mbledhjen e dokumenteve dhe shpalljen e fituesve, ndërsa pagesat kryhen nga Drejtoria e Financës.

“Fondi kalon te pjesa e financës, nuk kalon tek unë. Unë merrem vetëm me pjesën e shkresave. Për pjesën time, isha në rregull?”, konstatoi Çukani.

Sipas drejtorit të financës, Hiqmet Haxhaj, bashkia kishte dërguar kërkesën për fond pranë Ministrisë së Financave.

Në total janë 463 nxënës përfitues nga shkollat 9-vjeçare, gjimnazet dhe shkollat profesionale.

Gjatë përballjes, drejtori i Financës deklaroi, se lista për bursat e shkollave 9-vjeçare dhe gjimnazeve ishte kaluar që më 18 mars. Por kjo u mohua nga Fiona Çukani, e cila tha se nuk kishte marrë asnjë informacion nga drejtori i Financës.

“Mua nuk më ka ardhur asnjë informacion nga shef Hiqmeti për lajmërimin e shkollave”, kundërshtoi Çukani.

Ndërkohë, rezultoi, se shkresa për fondet e bursave të shkollave profesionale ishte nisur në 11 maj drejt Ministrisë së Ekonomisë.

Në fund, së bashku me qytetaren, “Stop” u drejtua në postë, ku u konfirmua se lista e përfituesve kishte mbërritur jo më 18 mars, por në fund të prillit.

Në këtë mënyrë, pas shumë peripecive, qytetarja arriti të marrë këstin e parë të bursës.

Gazetarja: Bursat e nxënësve, pagesa nga Bashkia.

Punonjësja: Po, ekselent apo me ndihmë ekonomike?

Denoncuesja: Me ndihmë ekonomike.

Punonjësja: Po ka ardhur, kësti i parë.

Denoncuesja: Kur?

Punonjësja: Ka ardhur në fund të prillit si listë.

Denoncuesja: Në fund të prillit erdhi?

Punonjësja: Po!/ Tv Klan