E fundit!

14:19 Aktualitet

Qeveria plan për rivlerësimin e profesioneve të rregulluara, në fokus 323 kategori

Shqipëria do të nisë një proces të gjerë për rishikimin e ...

25 vjet me dokumente italiane/ I bllokohet kthimi në Portin e Vlorës

3 Korrik 2023, 22:50, Denoncim CNA

“Stop” ishte në Vlorë me qytetarin Donald Levani, i cili është bllokuar në Shqipëri pasi nuk e lejojnë të kalojë në Portin e Vlorës. Ai tregoi se ka emigruar që në vitin 1998 me familjen.

Donaldi ka dokumente italiane dhe prindërit e tij po ashtu. Në 2019-ën i ka përfunduar ‘permeso’ dhe gjatë prodhimit të dokumentit të ri është bërë një gabim.

Në vend të ishte shkruar pa afat, policia e Leçes e ka lëshuar për dy vjet. Për këtë problem Donaldi është në proces gjyqësor në Itali, ku jeton e punon.

“Momentalisht dua të drejtohem drejt gjyqit, por nuk kaloj dot kufirin shqiptar”, tregon ai.

Në fillim të Marsit ka ardhur në Shqipëri dhe teksa ka tentuar të kthehet sërish në Itali, nuk e kanë lejuar pasi e trajtojnë si turist që ka kaluar ditët e lejuara në zonën Shengen.

“I kam të gjitha dokumentet, edhe dokumentacionin e gjyqit të përkthyer në shqip, ua kam prezantuar punonjësve dhe thjesht ata insistojnë se nuk ka dokumentacionin e duhur”, tha ai.

Deri tani ka katër refuzime në Portin e Vlorës.

Punonjësi i Kufirit Vlorë: Mua më duhet fakti, që ti nuk ke një leje qëndrimi të vlefshme, nuk ke një vizë hyrje për zonën Shengen dhe ke konsumuar ditët e qëndrimit. Të janë shpjeguar të paktën 3 herë problemet, që ti ke. Me copa letre, që nuk i duhen kurrkujt, mos eja përsëri për të njëjtin problem! Në qoftë se nuk ke leje qëndrimi, apo vizë, nuk shkon drejt zonës Shengen.

Qytetari: Po vazhdoj me gjyq unë andej.

Punonjësi i Kufirit Vlorë: Po gjyqin vazhdoje, kush të thotë gjë! Gjyqi të nxjerrë vendim, që ti të shkosh të marrësh vizë!

Qytetari: Në Itali jam i rregullt unë.

Punonjësi i Kufirit Vlorë: Në Itali të qëndrojë o shoku im, po këtu të duhet një dokument!

Qytetari: Njerëzisht të themi mos hajde më, se bën gabim, harxhohesh kot!

Ish-drejtori i Kufirit në Portin e Vlorës, Arben Hajdarmataj, e shpjegon situatën dhe hapësirën mbi të cilën mund të veprohet, në mënyrë që të mos penalizohet qytetari.

“Sipas procedurave ai përderisa ka një leje qëndrimi në shtetin italian, aq më tepër 20 vjet qëndrim, ai ka të drejtë të hyjë dhe të dalë në çdo kohë, pavarësisht se punonjësi i policisë në momentin e parë që paraqet pasaportën mund të shikojë që i ka kaluar ditët e qëndrimit në Itali. Pavarësisht kësaj ai duhet të kërkojë dokumente dhe shpjegime shtesë pse dhe në çfarë pozite juridike je në marrëdhënie me shtetin italian. Në momentin që shtetasi shqiptar paraqet dokumentacionin dhe argumentet që ka pasur një leje qëndrimi, ka procese gjyqësore, pra ia argumenton punonjësit të policisë në pikën e kalimit që i ka të gjitha dokumentet nuk ka asnjë mundësi praktike që të refuzohet kalimi nga shteti shqiptar në shtetin italian”, tha Hajdarmataj./tvklan