Vijojnë përplasjet në kantierin e aeroportit të Vlorës/ Kërkohet ndërhyrja e policisë, reagon Behgjet Pacolli

24 Qershor 2026, 11:00, Aktualitet CNA

Vazhdojnë tensionet në kantierin e aeroportit të Vlorës. Për të tretën ditë radhazi janë regjistruar përplasje dhe konfrontime mes punonjësve të kompanisë "Mabco" dhe "2A Group".

Ditën e sotme në kantierin e aeroportit të Vlorës, ndodhet edhe vëllai i Behgjet Pacollit, Emin Pacolli. Ky i fundit ka kërkuar ndërhyrjen e Policisë së Shtetit për zgjidhjen e situatës dhe lejimin e nisjes së punimeve në aeroport.

“Ju erdhët këtu sot, nuk e hapni dot rrugën? Lejoni aksesin që të kryejmë punët tona. Na bllokojnë këtu, për çfarë arsye? Ne na larguat. I shihni kamionët që e kanë bllokuar hyrjen, pse nuk reagoni? A duhet të nxjerr armët e të vritem me ata? Herën e kaluar na thatë është rrugë fshati e nuk duhet ta bllokoni. Tani pse bllokohet rruga?”, raportohet se ka thënë ai.

Ndërkohë lidhur me tensionet ka reaguar sërish biznesmeni Behgjet Pacolli, i cili shprehet se grupe të lidhura me Valon Ademin kanë bllokuar hyrjet e aeroportit të Vlorës dhe kanë penguar lëvizjen e lirë të punonjësve.

Postimi i plotë:

Si është e mundur që një grup privat, duke vepruar në kundërshtim me ligjin, të bllokojë një rrugë publike pa asnjë bazë ligjore, me vetëgjyqësi dhe nën mbrojtjen e institucioneve shtetërore?

Mediat shqiptare dhe ndërkombëtare qe sa ditë janë duke raportuar këtë realitet të shëmtuar që po zhvillohet në hyrje të arealit të Aeroportit Ndërkombëtar të Vlorës.

Kjo po ndodh në republikën Shqipërisë!!!

Prej muajsh, grupe të jashtëligjshme të lidhura me Valon Ademin, të mbështetura nga forca të Policisë së Shtetit, kanë bllokuar akceset madje edhe rrugën publike që të çon drejt hyrjes së aeroportit, duke penguar lëvizjen e lirë të punonjësve, duke i privuar ata nga e drejta kushtetuese për të punuar dhe duke ndërhyrë në posedimin dhe përdorimin e mjeteve e pajisjeve të tyre të punës.

Ky është një precedent jashtëzakonisht i rrezikshëm për shtetin e së drejtës dhe ngre pikëpyetje serioze mbi rolin e institucioneve publike, të cilat kanë detyrimin ligjor të garantojnë rendin, ligjshmërinë dhe të drejtat e qytetarëve, e jo të tolerojnë apo të mbështesin veprime arbitrare dhe të paligjshme.

Publiku meriton të dijë të vërtetën:

* kush qëndron mbrapa këtij akti ilegal e të shëmtuar?

• Kush e ka autorizuar këtë bllokadë?

• Mbi çfarë baze ligjore është bllokuar një rrugë publike?

• Kush mban përgjegjësi për pengimin e aktivitetit normal të një projekti me rëndësi kombëtare?

• Kush po nxit konfliktin dhe kujt i shërben përshkallëzimi i kësaj situate?

• Kush po i inkurajon grupet private të marrin përsipër funksione që i përkasin vetëm shtetit dhe institucioneve të tij?

• Kush po e pengon qëllimisht përfundimin dhe hapjen e Aeroportit Ndërkombëtar të Vlorës dhe për çfarë interesash?

Ne në menyrë ALARMANTE dhe NJERZORE bëjmë thirrje Prokurorisë së Posaçme Kundër Korrupsionit dhe Krimit të Organizuar (SPAK), si dhe të gjitha institucioneve kompetente, të NISIN menjëherë hetimet për këtë situatë alarmante.

Kjo nuk është thjesht një mosmarrëveshje tregtare apo kontraktore. Kjo është një çështje e sundimit të ligjit, e sigurisë juridike, e funksionimit të institucioneve shtetërore dhe e mbrojtjes së interesit publik.

Askush nuk duhet të jetë mbi ligjin dhe askush nuk duhet të lejohet të zëvendësojë shtetin me vetëgjyqësi. /CNA