“Bashkitë në fazë të re zhvillimi”/ Demo: Duhen projekte cilësore për të përthithur fondet e BE-së

24 Qershor 2026, 10:08, Aktualitet CNA

Ministri i Shtetit për Pushtetin Vendor, Ervin Demo, deklaroi se bashkitë duhet të hyjnë në një fazë të re zhvillimi dhe të forcojnë kapacitetet e tyre për përgatitjen e projekteve cilësore, me qëllim përthithjen më të mirë të fondeve të Bashkimit Europian, si pjesë e procesit të përafrimit të Shqipërisë me standardet europiane.

Sipas tij, në tri dekadat e fundit Shqipëria ka bërë një rrugë të gjatë në zhvillimin e rrjeteve të komunikimit, ndërsa sot bizneset kanë më shumë akses dhe më shumë shërbime digjitale, çka përbën një zhvillim pozitiv dhe të domosdoshëm.

Megjithatë, ministri theksoi se ende ekzistojnë problematika që duhet të adresohen. Në shumë qytete, veçanërisht në zonat turistike, vijojnë të vërehen kabllo ajrore të vendosura pa standard, shtylla të improvizuara dhe rrjete të mbivendosura, të cilat përbëjnë jo vetëm probleme estetike, por edhe çështje sigurie.

Demo nënvizoi se bashkitë e njohin më mirë territorin dhe për këtë arsye roli i tyre është vendimtar. Ato duhet të jenë aktorët kryesorë të bashkëpunimit, të koordinojnë institucionet dhe të garantojnë që standardet e reja të ruhen në kohë.

Sipas tij, plani i veprimit do të nisë në korrik dhe gusht, ku do të ngrihen grupe pune për zbatimin e ndërhyrjeve konkrete. Në zonat ku do të realizohen punimet, do të vendoset një standard i ri infrastrukture.

Ministri theksoi gjithashtu se infrastruktura nëntokësore nuk duhet parë si kosto, por si investim afatgjatë për zhvillimin urban dhe sigurinë e qytetarëve.

“Bashkitë duhet të hyjnë në një fazë të re zhvillimi. Bashkitë duhet të kenë aftësi për të përgatitur projekte cilësore për të përthithur më mirë fondet e BE-së si pjesë e përgatitjes së Shqipërisë për standardet europiane.

Në tri dekada Shqipëria ka bërë rrugë të gjatë në zhvillimin e rrjeteve të komunikimit. Sot bizneset kanë më shumë akses, më shumë shërbime digjitale. Ky është zhvillim pozitiv dhe i domosdoshëm.

Ka shumë problematika që duhet t’i adresojmë. Në shumë qytete, zonat turistike shohim ende kabllo ajrore të vendosura pa standard, shtylla të improvizuara, rrjete të mbivendosura. Në disa raste nuk janë vetëm problematika estetike, por edhe çështje sigurie.

Bashkitë e njohin më mirë territorin, prandaj roli i tyre është vendimtar. Ato duhet të jenë aktorët kryesorë të bashkëpunimit, të koordinojnë aktorët dhe duhet të garantojnë që standardi i ri të ruhet në kohë. Plani i veprimit do të nisë në korrik dhe gusht; do të ngrihen grupet e punës për zbatimin e planit konkret. Në zonat ku do të ndërhyhet, do të vendoset një standard i ri.

Infrastruktura nëntokësore nuk duhet parë si kosto”, tha Demo./ CNA