“Transporti, hallka më e dobët e sistemit”/ Rama prezanton planin

24 Qershor 2026, 10:23, Aktualitet CNA

Kryeministri Edi Rama ka prezantuar një nismë të re me përmasa të mëdha dhe shtrirje në disa drejtime strategjike për komunitetet, e cila pritet të lançohet publikisht në një konferencë të pushtetit vendor në 10-ditëshin e parë të korrikut.

Bëhet fjalë për programin kombëtar “Rilindja Urbane 2.0”, i cili synon të adresojë një sërë elementësh që, sipas qeverisë, ka ardhur koha të trajtohen në mënyrë më të plotë dhe të strukturuar.

Sipas Kryeministrit, programi do të fokusohet në ndërhyrje gjithëpërfshirëse në sektorë të ndryshëm të infrastrukturës, përfshirë edhe sistemin e ujësjellës-kanalizimeve, duke synuar përmirësimin e mëtejshëm të shërbimeve publike në të gjithë territorin.

Rama theksoi gjithashtu se, ndonëse shpesh në diskursin publik theksohen problematikat, pjesa më e madhe e sistemit të ujësjellës-kanalizimeve është e investuar, ndërsa mbeten ende segmente që kërkojnë ndërhyrje.

Një tjetër fokus i programit është transporti urban dhe interurban, i konsideruar si një nga hallkat më të dobëta të sistemit aktual, veçanërisht në periudhat e pikut të sezonit turistik, kur lëvizja bëhet më e vështirë për qytetarët dhe turistët.

Në këtë kuadër, qeveria parashikon futjen e autobusëve elektrikë me zero ndotje, në linjë me tendencat europiane për transport më të qëndrueshëm. Sipas planit, do të krijohet një sistem i ri administrimi ku bashkitë do të kenë rol kryesor në menaxhimin e mjeteve, ndërsa financimi do të bëhet në bashkëpunim me qeverinë qendrore.

Programi “Rilindja Urbane 2.0” pritet të shtrihet në të gjithë vendin dhe të shoqërohet me një aparat logjistik që do t’u shërbejë bashkive për punime të mirëmbajtjes, pastrimit dhe ndërhyrjeve në kanalet kulluese dhe infrastrukturën lokale.

“Një tjetër nismë e një përmase shumë të madhe dhe të shtrirë në një sërë drejtimesh me natyrë strategjike për komunitete të cilën do ta lançojmë publikisht në një konferencë të pushtetit vendor në 10-ditëshin e parë të korrikut.

Bëhet fjalë për programin kombëtar 'Rilindja Urbane 2.0'. Është një program që synon të adresojë disa elementë që ka ardhur koha të marrin një drejtim shterues. Të adresojë të gjitha pjesët e mbetura të painvestuara; janë disa pjesë të cilat, ndryshe nga çfarë hidhet e spërdridhet në diskursin e përditshëm negativ, janë më pak, shumë më pak se pjesë të investuara të sistemit të ujësjellës-kanalizimeve.

Programi do të adresojë nevojën për të bërë një ndërhyrje gjithëpërfshirëse dhe për t’u dhënë përgjigje edhe këtyre nevojave të mbetura të adresuara të sistemit të ujësjellës-kanalizimeve. Do të adresojmë për të çuar në nivel tjetër transportin urban dhe interurban. Hallka më e dobët e sistemit tonë të industrisë që është transporti i sezonit të pikut që bëhet i vështirë për turistët për lëvizjen në sektorin publik.

Flasim për autobusë elektrikë që kanë 0 ndotje, që është një tendencë e përgjithshme në Europë. Për të ndërtuar një sistem të përdorimit dhe administrimit të këtyre mjeteve nën administrimin e bashkive, do të jetë qeveria së bashku me bashkitë që do të sigurojnë mjetet dhe bashkitë do të bëjnë administrimin e tyre përmes një sistemi që e kemi pilotuar me sukses.

Do ta shtrijmë në të gjithë territorin, do të kemi një aparat logjistik që do t’u shërbejë bashkive për punimet e domosdoshme të mirëmbajtjes, pastrimit, kanaleve kulluese”, tha Rama./ CNA