E fundit!

09:44 Politikë

Vrasja e efektivit në Maliq/ Rama: Nderime përjetë dëshmorit, ndëshkim maksimal për autorin

Kryeministri Edi Rama ka reaguar pak minuta më parë lidhur...

Shqipëria, në sytë e turistëve britanikë/ Alternativa e përballueshme për pushimet dimërore

4 Mars 2026, 13:09, Aktualitet CNA

Shqipëria, në sytë e turistëve britanikë/ Alternativa e

Pas viteve të kaluara duke kaluar dimrin në Turqi, disa udhëtarë po zbulojnë Shqipërinë si një destinacion më ekonomik dhe me eksperienca autentike.

Gazetarja dhe ekspertja e udhëtimeve, Heidi Fuller-Love, e cila ka jetuar në një duzinë vendesh përfshirë Argjentinën, Kamboxhian dhe Francën, dhe më pas është vendosur në Greqi, tregon për përvojën e saj në qytetet historike dhe bregdetet e Shqipërisë.

Në Berat, Fuller-Love shijoi një darkë tradicionale me vetëm 9 paund, duke përfshirë specialitete si fërgesa me djathë, byrek me spinaq dhe tavë kosi.

“Turqia ishte gjithmonë destinacioni im i preferuar për dimrin, por me rritjen e kostos, Shqipëria doli një alternativë fantastike,” shkruan ajo, duke shtuar se vendi ofron resorte bregdetare pothuajse të lira, ushqim të shkëlqyer dhe hotele me çmime konkurruese.

Shkrimi vë në pah edhe zhvillimin e turizmit në Shqipëri. Ndërsa vendi mbeti për dekada i izoluar gjatë regjimit të Enver Hoxhës, sot ai tërheq më shumë turistë dhe investitorë të huaj.

Vetëm në vitin 2024, Shqipërinë e vizituan 11.7 milionë vizitorë, nga 6.2 milionë në 2019. Një projekt i madh privat, si transformimi i ishullit të Sazanit në resort pesëyjësh, tregon se vendi po bëhet gjithnjë e më i njohur.

Fuller-Love përshkruan eksperiencën e saj në Tiranë, Krujë, Gjirokastër, dhe bregdetin e Tales, duke theksuar mikpritjen e shqiptarëve dhe mundësitë për turizëm dimëror me kosto shumë të ulëta.

Gazetarja thotë se: “Si alternativë dimërore ndaj Turqisë, Shqipëria ua kalon pritshmërive dhe ofron eksperienca autentike për çdo vizitor.”

Për lajmin ka reaguar edhe kryeministri Rama, i cili thekson se ky është një tjetër vlerësim ndërkombëtar për Shqipërinë.

“Prestigjiozja britanike 'The Telegraph' e rendit vendin tonë ndër destinacionet më të përballueshme dhe më tërheqëse në Europë, duke vlerësuar jo vetëm bukuritë natyrore dhe qytetet historike, por edhe mikpritjen shqiptare dhe kostot konkurruese për vizitorët.

Nga brigjet e Jonit e Adriatikut, tek Alpet madhështore dhe trashëgimia jonë kulturore, Shqipëria po konsolidohet gjithnjë e më shumë në hartën e turizmit ndërkombëtar si një zgjedhje autentike, e bukur dhe e përballueshme”, thotë Rama krahas publikimit të shkrimit./ CNA