E fundit!

15:47 Aktualitet

“Klasa politike të ikë në shtëpi”/ Tare: Çështja është te bulevardi, Rama zhvendos vëmendjen

Studiuesi Auron Tare tha sot se ndërsa çështja kryesore ës...

Sezoni turistik 2026/ Fluks vizitorësh, por sfidat mbeten

26 Qershor 2026, 14:29, Aktualitet CNA

Plazhet shqiptare janë mbushur me vizitorë, ndërsa sezoni turistik ka nisur me një fluks të lartë pushuesish vendas dhe të huaj.

Italia, Danimarka dhe vendet arabe janë mes tregjeve që këtë verë kanë zgjedhur Shqipërinë si destinacion për pushime.

Megjithatë, eksperti Denis Dema, në një intervistë për CNA TV, tregon se, krahas interesit në rritje, sektori i turizmit vijon të përballet me sfida që kërkojnë zgjidhje afatgjata.

“Sezoni turistik gjithmonë nis me sfidat e veta, me problematikat e veta, por Shqipëria, vitet e fundit, ka marrë një vëmendje ndërkombëtare dhe, normalisht, ka pasur bum rezervimesh edhe këtë vit. Pjesa për të cilën interesohen është Ksamili, Maldivet e Europës, për atë është bërë i njohur aktualisht dhe vijnë shumë turistë nga Italia, Danimarka, Suedia, Polonia dhe Sllovakia”, tha eksperti.

Edhe pse bregdeti mbetet destinacioni më i preferuar, turizmi malor ende nuk po arrin të tërheqë të njëjtin interes. Sipas ekspertit Denis Dema, një ndër arsyet kryesore është mungesa e promovimit të vazhdueshëm të këtyre destinacioneve, ndërsa infrastruktura e pamjaftueshme vazhdon të jetë një pengesë për zhvillimin e këtij segmenti të turizmit.

“Turizmi malor, për fat të keq, nuk e ka marrë promovimin e duhur, por duhet përmendur edhe infrastruktura në vend. Gjatë sezonit veror duhet të nisesh në orën 4:00 ose 5:00 të mëngjesit. Për shembull, për të shkuar në Shkodër duhet të nisesh shumë herët, sepse, përndryshe, do të mbetesh në trafik. Për të shmangur këto probleme duhet të bëjmë rrugë alternative ose autostrada, që edhe veriu i vendit të jetë i aksesueshëm”, deklaroi eksperti.

Shqipëria ofron një potencial të konsiderueshëm jo vetëm për turizmin bregdetar, por edhe për atë malor e natyror. Megjithatë, eksperti Denis Dema vlerëson se, për ta kthyer këtë potencial në një produkt konkurrues gjatë gjithë vitit, nevojiten investime në infrastrukturë, promovim dhe përmirësim të shërbimeve.

Ndërsa numri i turistëve vijon të rritet nga sezoni në sezon, sfida mbetet krijimi i një oferte turistike të qëndrueshme, që i jep vlerë çdo destinacioni dhe e shndërron Shqipërinë në një destinacion tërheqës gjatë të gjithë vitit./ CNA