web counter
LEXO PA REKLAMA!

SHKARKO APP

App Store
Google Play

Shtyhet afati i skemës kombëtare/ Salla: Në vijim diskutimet për IPARD

26 Qershor 2026, 13:55, Aktualitet CNA

Ministri i Bujqësisë, Andis Salla, njoftoi shtyrjen me 10 ditë të afatit për aplikimet në Skemën Kombëtare të mbështetjes, deri në datën 6 korrik, për shkak të numrit të lartë të të interesuarve.

“Këto ditë kemi pasur një rritje të ndjeshme të numrit të aplikimeve. Për t’u dhënë mundësi sa më shumë fermerëve të bëhen pjesë e Skemës Kombëtare, kemi vendosur ta shtyjmë afatin edhe me 10 ditë”, deklaroi ai.

Në një deklaratë të përbashkët me homologun e Kosovës, Armend Muja, ministri Salla konfirmoi gjithashtu progresin në negociatat me BE-në për fondet IPARD.

“Ne kemi rreth 40 mijë fermerë që kanë aplikuar deri tani, në 12 masat që ne kemi janë interesuar për të aplikuar. Është vendosur që të shtyhen me 10 ditë deri në datën 6 korrik afati për t’u dhënë mundësi fermerëve për të aplikuar. Presim një delegacion për të dakordësuar lidhur me fondet për IPARD. Jemi në progres e sipër, është një proces pozitiv dhe presim që IPARD të dakordësohet sa më shpejt. Prandaj janë disa komponentë mbështetës për fermerët shqiptarë”, u shpreh ministri.

Kujtojmë se për shkak të parregullsive dhe keqpërdorimeve të konstatuara, Komisioni Europian vendosi në korrik 2023 të ndërpresë mbështetjen për Shqipërinë, duke penguar hapjen e IPARD III. Ndërkohë, fondet për fermerët përfitues të IPARD II, që i përkisnin periudhës 2014-2022, janë përmbyllur dhe kapin gjithsej 94 milionë euro. Mungesën e këtij financimi e ka mbuluar buxheti i shtetit përmes Skemës së Investimeve dhe skemës kombëtare të subvencioneve.

Ministrat u angazhuan gjithashtu për heqjen e barrierave administrative dhe digjitalizimin e kontrolleve, me synim lehtësimin e tregtisë së produkteve agroushqimore mes dy vendeve dhe rritjen e konkurrueshmërisë së fermerëve./ CNA





Lajmet e fundit nga