Seanca maratonë/ Kuvendi miraton katër projektligje, Rama shkon vetëm për votimin

8 Maj 2026, 08:02, Aktualitet CNA

Seanca maratonë/ Kuvendi miraton katër projektligje, Rama shkon

Kuvendi i Shqipërisë zhvilloi dje seancën plenare të radhës, ku miratoi katër projektligje, një akt normativ dhe gjashtë projektvendime, ndërsa disa nisma të opozitës u rrëzuan me votat e mazhorancës.

Seanca nisi me një minutë heshtje në nderim të ish-kryetarit të Kuvendit, Servet Pëllumbi, pas ndarjes së tij nga jeta. Më pas u miratua procesverbali i seancës së 4 majit 2026 dhe kryetari i Kuvendit, Niko Peleshi, prezantoi rendin e ditës.

Në fillim të punimeve u zhvilluan dy interpelanca të kërkuara nga deputetë të Partisë Demokratike, njëra me Kryeministrin Edi Rama, e deleguar te ministrja për Marrëdhëniet me Parlamentin, Erjona Ismaili, dhe tjetra me ministrin e Infrastrukturës dhe Energjisë, Enea Karakaçi.

Teksa mungoi në interpelancë kryeministri Edi Rama shkoi në Parlament vetëm në momentin e votimit të projektligjeve.

Ndër aktet më të rëndësishme të miratuara ishte akti normativ për ndryshime në ligjin “Për akcizat në Republikën e Shqipërisë”, i cili kaloi me 85 vota pro dhe 25 kundër.

Kuvendi miratoi gjithashtu marrëveshjen ndryshuese për programin IPA të bashkëpunimit ndërkufitar Mali i Zi–Shqipëri 2021–2027, me 108 vota pro dhe vetëm një abstenim.

Me shumicë votash u miratuan edhe ndryshimet në ligjin “Për shtetësinë”, projektligji për ndryshime në ligjin “Për inspektimin në Republikën e Shqipërisë”, si dhe projektligji “Për identifikimin elektronik, shërbimet e besuara dhe portofolin e identitetit digjital”.

Nga ana tjetër, Kuvendi rrëzoi disa projektligje të propozuara nga opozita dhe Partia e Lirisë, përfshirë ndryshimet në ligjin për taksat kombëtare, akcizat dhe projektligjin për mekanizmin e reagimit ndaj krizave të furnizimit dhe çmimeve të lëndës djegëse.

Gjatë seancës u votuan edhe disa emërime në institucione të rëndësishme. Ahmet Prençi u zgjodh Komisioner në Zyrën e Avokatit të Popullit për Mekanizmin Kombëtar për Parandalimin e Torturës, ndërsa Alma Faskaj u emërua Komisionere për Mbrojtjen dhe Promovimin e të Drejtave të Fëmijëve.

Po ashtu, Genta Tafa u zgjodh Komisionere për Mbrojtjen nga Diskriminimi, ndërsa Merita Bejtja mori detyrën e Inspektores së Përgjithshme të Bankës së Shqipërisë.

Në fund të seancës, Kuvendi miratoi edhe strukturën dhe organikën e Entit Rregullator të Ujit, ndërsa punimet u mbyllën rreth orës 00:35./ CNA