"Me probleme të vazhdueshme korrupsioni"/ Raporti i Freedom House: Shqipëria, vend "pjesërisht i lirë"

19 Mars 2026, 09:24, Aktualitet CNA

"Me probleme të vazhdueshme korrupsioni"/ Raporti i Freedom

Freedom House ka publikuar raportin e vitit 2026 për për gjendjen e demokracisë në botë. Në raport Shqipëria vlerësohet me 69 pikë nga 100 pikë dhe cilësohet si një vend "pjesërisht i lirë".

Në raport thuhet se partitë politike në Shqipëri janë shumë të polarizuara dhe shpesh të organizuara rreth personaliteteve kryesore.

Ndër të tjera në raport të drejtat politike vlerësohen me 28 nga 40 pikë dhe liritë civile vlerësohen me 41 nga 60 pikë. Freedom House thekson se korrupsioni dhe ryshfeti mbeten problematike.

“Shqipëria ka një rekord zgjedhjesh konkurruese, megjithëse partitë politike janë shumë të polarizuara dhe shpesh të organizuara rreth personaliteteve kryesore. Liria fetare dhe liria e tubimit në përgjithësi respektohen. Korrupsioni dhe ryshfeti mbeten probleme të mëdha, megjithëse qeveria po punon për të adresuar korrupsionin në gjyqësor”, thuhet në raport.

Këtë vit Shqipëria ka shënuar përparim me një pikë, krahasuar me raportin e vitit të kaluar. Ndërkohë nga vendet e tjera të rajonit, pas Shqipërisë vjen Mali i Zi me 68 pikë, Maqedonia e Veriut me 67, Kosova me 61, Bosnja e Hercegovina me 54 pikë, ndërsa Serbia e fundit me vetëm 53 pikë.

Sa i përket Kosovës, raporti evidenton progres në funksionimin e institucioneve demokratike dhe në zhvillimin e zgjedhjeve, por thekson se sfidat në sundimin e ligjit dhe korrupsioni mbeten.

Në Mal të Zi dhe Maqedoni të Veriut, vërehen zhvillime të përziera, me përparime në disa reforma, por edhe shqetësime për ndikimin politik në institucione. Ndërsa në Serbi, raporti nënvizon probleme më të theksuara që lidhen me përqendrimin e pushtetit dhe lirinë e mediave.

Në nivel global, Freedom House thekson se demokracia vijon të përballet me sfida në shumë vende të botës, pavarësisht disa përpjekjeve për përmirësim. /CNA