web counter
LEXO PA REKLAMA!

SHKARKO APP

App Store
Google Play

E fundit!

x

Kryepiskopi Joan mesazh ngushëllimi për ndarjen nga jeta të Patriarkut Ilia II të Gjeorgjisë

18 Mars 2026, 16:30, Aktualitet CNA

Kryepiskopi Joan mesazh ngushëllimi për ndarjen nga jeta të

Kryepiskopi i Tiranës, Durrësit dhe i gjithë Shqipërisë, Joani, i ka dërguar një letër ngushëllimi Metropolitit Shio, Locum Tenens i Fronit Patriarkal të Gjeorgjisë, me rastin e ndarjes nga jeta të Patriarkut-Katolikos të Gjithë Gjeorgjisë, Ilia II.

Në mesazhin e tij të ngushëllimit, Kryepiskopi Joan e cilësoi Patriarkun e ndjerë si “vëllanë tonë më të dashur në Zotin”, duke vlerësuar kontributin e tij të jashtëzakonshëm në drejtimin e Kishës së Gjeorgjisë për gati pesë dekada.

Ai theksoi se Ilia II e udhëhoqi Kishën me urtësi, durim dhe besim të thellë, sidomos gjatë periudhës së vështirë të shtypjes sovjetike.

Sipas Kryepiskopit, Patriarku Ilia II arriti të ringrinte Kishën nga rrënojat, duke ndërtuar kisha dhe manastire, si dhe duke frymëzuar besimtarët të riktheheshin në besimin e etërve të tyre.

Kryepiskopi Joan u shprehu gjithashtu ngushëllimet e tij Sinodit të Shenjtë, klerit dhe popullit besimtar të Kishës së Gjeorgjisë. Në shenjë nderimi, në paraklisin e Kryepiskopatës u mbajt një përshpirtje për prehjen e shpirtit të Patriarkut të ndjerë.

 

Mesazhi i Kryepiskopit

 

Fortlumturia Juaj,

Me dhimbje të thellë morëm lajmin për fjetjen në Zotin të vëllait dhe bashkëshërbestarit tonë më të dashur, Katolikos-Patriarkut të Gjithë Gjeorgjisë, Fortlumturisë dhe Shenjtërisë së Tij Ilia II, i cili për gati pesë dekada e udhëhoqi Kishën e Gjeorgjisë me urtësi, durim dhe besim të thellë. Ai u dallua për karakterin e tij të drejtë, përkushtimin ndaj traditës ortodokse, dashurinë për popullin besimtar të Gjeorgjisë dhe për angazhimin e palëkundur ndaj unitetit të Ortodoksisë.

Duke marrë detyrën patriarkale gjatë periudhës së vështirë të shtypjes sovjetike, Patriarku i ndjerë Ilia udhëhoqi kopenë e tij “të cilën e donte” me vetëflijim dhe urtësi, duke e ngritur Kishën nga rrënojat, duke ndërtuar kisha dhe manastire dhe duke frymëzuar popullin e Perëndisë të rikthehej në besimin e etërve të tyre.

Shprehim ngushëllimet tona të përzemërta ndaj Sinodit të Shenjtë, klerit të devotshëm dhe popullit besimtar të Kishës së Gjeorgjisë. Zoti i dhëntë prehje shpirtit të tij fisnik “në tendat e të drejtëve”. I përjetshëm qoftë kujtimi i tij!

Me dashuri të sinqertë në Krishtin, Kryepiskop i Tiranës, Durrësit dhe i gjithë Shqipërisë, Joani





Lajmet e fundit nga