web counter
LEXO PA REKLAMA!

SHKARKO APP

App Store
Google Play

E fundit!

x

Fitër Bajrami në Korçë/ Mesazhi i Myftiut Ledian Cikalleshi

19 Mars 2026, 09:21, Aktualitet CNA

Besimtarët myslimanë në Qarkun e Korçës kremtojnë nesër festën e Fitër Bajramit, që shënon përfundimin e muajit të shenjtë të Ramazanit.

Në mesazhin e tij zyrtar, Myftiu i Korçës, Ledian Cikalleshi, uroi të gjithë besimtarët për këtë ditë të shenjtë, duke e cilësuar Fitër Bajramin si një moment reflektimi, solidariteti dhe afrimi mes njerëzve.

Ai theksoi se muaji i Ramazanit shërben si një periudhë përkushtimi, sakrifice dhe ndarjeje me të tjerët, ku vlerat e barazisë dhe devotshmërisë marrin kuptim të veçantë.

Sipas myftiut, atmosfera shpirtërore e këtij muaji duhet të shërbejë si frymëzim për të forcuar lidhjet njerëzore dhe për të ndërtuar një shoqëri më të drejtë dhe më solidare.

Ceremonia e faljes së Fitër Bajramit në qytetin e Korçës do të zhvillohet në ambientet përpara xhamisë “Iljas Bej Mirahori”.

Programi nis në orën 06:20, ndërsa falja e namazit të Bajramit do të kryhet në orën 06:50. Në zonat e tjera, besimtarët do të mblidhen në xhamitë përkatëse.

Ndërkohë, pritjet dhe urimet tradicionale do të organizohen në ambientet e Myftinisë Korçë nga ora 10:00 deri në 11:30.

Në mbyllje të mesazhit të tij, Myftiu uroi besimtarët për më shumë shëndet, mirësi dhe harmoni në familjet e tyre.


Mesazhi i Myftiut Ledian Cikalleshi:

Bismil-lahi Rrahmani Rrahim! Me emrin e Allahut, Mëshiruesit, Mëshirëbërësit!

Të nderuar besimtarë myslimanë të Qarkut të Korçës, motra dhe vëllezër!

Në emër të Myftinisë së Zonës Korçë dhe në emrin tim personal, ju uroj gëzuar Fitër Bajramin, ditën e shpërblimit, të harmonisë shpirtërore, solidaritetit, e vëllazërisë dhe të afrimit me njëri-tjetrin.

Ne po e përcjellim me përmallim Muajin e Bekuar të Ramazanit, me shpresën e madhe, që Zoti të na ketë falur mëkatet tona dhe të ketë pranuar lutjet, adhurimet dhe sakrificën tonë.

Ramazani na mësoi se mirësitë dhe begatitë që na ka dhënë i plotfuqishmi, marrin kuptim, vetëm atëherë kur ndahen me të tjerët me synim fitimin e kënaqësisë së Zotit. Ky muaj i madhërueshëm na mësoi se sofra e iftarit është sofra e vëllazërisë, mes besimtarëve, vëllezërve dhe miqve, mes të pasurve dhe të varfërve. Të gjithë jemi të barabartë para Krijuesit, dallimi është vetëm në devotshmëri, në përkushtim dhe te sinqeriteti në vepër të mirë që bëjmë.

Atmosfera shpirtërore që përjetuam gjatë muajit të bekuar të Ramazanit na forcon dhe motivon ta shohim festën e Fitër Bajramit si ditën e shpresave të reja, si ditën e të kujtuarit dhe solidaritetit me njëri-tjetrin, si ditën e ripërtëritjes së dashurisë për njeriun dhe njerëzoren.

Fitër Bajrami është nesër, ditën e premte, dt.20 mars 2026. Ceremonia e faljes për dy xhamitë e qytetit do të zhvillohet para oborrit të xhamisë së vjetër “Iljas Bej Mirahori”, ndërsa në zonat e tjera në xhamitë përkatëse.

Janë të mirëpritur të gjithë besimtarët, burra dhe gra, fëmijë e të moshuar, të marrin pjesë në ceremoninë e faljes së Bajramit, e cila fillon në orën 06:20 dhe kulmon me faljen e namazit të Bajramit në orën 06:50.

Ceremonia e pritjes dhe urimeve do të zhvillohet në ambientet e Myftinisë Korçë mes orës 10:00 – 11:30.

Më lejoni së fundmi në këto çaste të gëzuara të festës së Fitër Bajramit, këtij momenti të gëzimit dhe të lehtësimit shpirtëror, t'ju përcjell mesazhet e mia më të sinqerta për një jetë sa më të lumtur, për shëndet dhe mirësi. Gëzuar dhe për shumë vjet Fitër Bajramin!/ CNA





Lajmet e fundit nga