Provat e reja për 21 Janarin/ Berisha nuk e lëshon Bashën

23 Janar 2023, 12:34, Aktualitet CNA

Kreu i PD-së, Sali Berisha, është pyetur në lidhje me provat e reja të dala për tragjedinë e 21 Janarit.

Bëhet fjalë për një audio-regjistrim, ku komunikonte “grupi i zjarrit”, në të cilin bënin pjesë, Ndrea Prendi e të tjerë, me Lulzim Bashën.

Berisha nuk ka pranuar të komentojë, siç i ka quajtur ai, manipulimet e Ardi Veliut.

“Që unë të komentoj manipulimet e Ardi Veliut, harroje.

I takon medias të thonë të vërtetën e atij manipulimi. Nuk mund të komentoj unë, disa tabela shkrimi që paraqiten si audiopërgjim dhe nuk ekzistojnë. Nuk u paraqit audioja, por dëshmoi qartësisht se ishte një manipulim dhe falsifikim.

Njëlloj si shiriti i 21 janarit, ku u tha se Sali Berisha ishte i implikuar në problemin e hidrocentralit.

Pra, është gjithçka krijesë e Ardi Veliut.

Duke thënë këtë, theksoj edhe një herë se 21 Janari përbën një nga ngjarjet më tragjike, përpjekje për grusht shteti, marrje pushteti me dhunë nga ata që i kam denoncuar me kohë”, ka thënë Berisha.

Sipas kreut të PD-së, SHBA-ja kërkoi të hetoheshin organizatorët e dhunës më 21 Janar, Rama ka përgjegjësi penale.

“Komuniteti ndërkombëtar dhe në veçanti SHBA-ja, ka kërkuar me të madhe që të hetohen organizatorët dhe autorët e dhunës.

Edi Rama është personi kryesor, organizator i dhunës. Edi Rama nuk gjeti kurrë kurajë të paraqitej në prokurori, ndonëse u thirr për të dëshmuar.

Edi Ramën do e ndjekë gjithë jetën përgjegjësia penale për organizimin e asaj dhune.

Ai është faktuar si organizator në mënyrën më të pakundërshtueshme. Pjesa e gardistëve është hetuar nga një kundërshtare e egër e Sali Berishës. Është hetuar me një prani të rëndësishme ndërkombëtare. Dhe janë dhënë dënimet e njohura deri më tani.

Por, meqenëse shërbehet me krijime të Ardi Veliut, i them lëri ato, hajde, hiq imunitetin se unë nuk kam imunitet për asgjë, dhe shko dëshmo për organizimin e puçit.

I solli si mish për top. Natyrisht, ngjarja është tragjike. Atëherë dhe sot, familjarët kanë ngushëllimet e mia.

Por manipulimi që bën Edi Rama për njerëzit që përdori si mish për top se donte të vinte në pushtet, është makabritet”, është shprehur Berisha./CNA.al