"Portat digjitale, së shpejti në aeroportin e Rinasit"/ Rama: Shqipërisë i duhet turizmi elitar

19 Qershor 2026, 16:47, Aktualitet CNA

Kryeministri Edi Rama ka mbajtur fjalën e tij në ceremoninë inauguruese të fluturimit të parë Tiranë–Toronto në aeroportin e Rinasit. Rama u shpreh se në këtë aeroport, përveç rritjes së numrit të pasagjerëve, ka pasur edhe përmirësim të cilësisë së shërbimit.

Kryeministri njoftoi se së shpejti në aeroportin e Rinasit do të vendosen portat digjitale, të cilat, sipas tij, do të jenë porta ku do të kalohet pa asnjë lloj kontrolli për ata që kanë pasaportë shqiptare dhe informacioni do të merret vetëm nëpërmjet Inteligjencës Artificiale.

“Nuk është vetëm rritja e numrit të pasagjerëve, por edhe përmirësimi i cilësisë së shërbimit. Aeroporti Ndërkombëtar i Rinasit ka hedhur i pari kalimin e digjitalizuar të ‘check in’ dhe ‘check out’. Së shpejti do të hapim një kapitull të ri të modernizimit, kapitullin e portave digjitale, të cilat do të jenë porta ku do të hyhet pa asnjë lloj kontrolli nëse je shqiptar dhe ke pasaportë shqiptare. Për të gjithë pasagjerët shqiptarë që hyjnë në aeroportin e Rinasit do të jetë si hyrje në shtëpinë e tyre dhe i gjithë informacioni do të merret nëpërmjet inteligjencës artificiale. Do të jetë transformim i jashtëzakonshëm në shumë aspekte. Jemi sot në një moment të rëndësishëm edhe për faktin se Shqipëria ka përmbyllur një fazë transformimi në turizëm dhe duhet të hyjë në një fazë tjetër", u shpreh kreu i qeverisë.

Ndër të tjera, Rama tha se Shqipëria ka nevojë për turizmin e gamës së lartë në mënyrë të ketë rritje të të ardhurave për komunitetin dhe ekonominë.

"Rritja e vazhdueshme e numrit të turistëve që janë në kategorinë e turizmit masiv nuk sjell rritje të të ardhurave. Nëse krahasojmë të ardhurat që rriten shumë ngadalë me shpenzimet që rriten shumë shpejt, atëherë llogaria është shumë e thjeshtë. Është një llogari e thjeshtë për të gjithë ata që bien në një të menduari në dukje të drejtë, por në thelb tërësisht të gabuar, që për çfarë na duhet ne turizmi i gamës së lartë, apo se për çfarë na duhen resorte ku vijnë të pasur kur ne nuk kemi akses në to. Në fakt, e kundërta është e vërtetë. Në fakt, na duhen sa më shumë nga ato për të pasur sa më shumë të ardhura për komunitetin, ekonominë, biznesin dhe arkën e shtetit. Do të vazhdojmë të sjellim më shumë turistë, por ajo çka tanimë duhet është të sjellim më tepër të ardhura në familjet shqiptare dhe në arkën e shtetit", tha Rama. /CNA