Ndihma humanitare nga Gjermania/ Mbërrijnë në Pogradec pajisje për shkolla, institucione dhe familjet në nevojë

20 Korrik 2026, 15:17, Sociale CNA

Një tjetër transport me ndihma humanitare nga Gjermania ka mbërritur në Pogradec, duke sjellë pajisje të shumta për shkolla, kopshte, institucione publike dhe familje në nevojë. Tre kamionë me banka, karrige, mjete didaktike, pajisje sportive, krevate për paraplegjikë, karroca invalidësh dhe materiale të tjera u shkarkuan në qytet, në kuadër të bashkëpunimit mes shoqatës gjermane të motoristëve dhe kamionistëve dhe përfaqësuesve të saj në Shqipëri.

Ndihma humanitare nga Gjermania/ Mbërrijnë në Pogradec pajisje

Historia e kësaj nisme humanitare ka nisur rreth 25 vite më parë. Ish-presidenti i shoqatës gjermane, Hermann Munzel, tregon se fillimisht qëllimi ishte bashkimi i grupeve të motoristëve nga vende të ndryshme të Europës, por shumë shpejt aktiviteti i tyre mori edhe një dimension humanitar.

Ndihma humanitare nga Gjermania/ Mbërrijnë në Pogradec pajisje

“Unë vij nga Shoqata e Motoristëve dhe Kamionistëve nga Gjermania dhe jam ish-presidenti i kësaj shoqate, e cila ka filluar para 25 vitesh nga grupe të ndryshme në Europë, t’i bashkojë ata dhe të bisedojmë si mund të bëjmë ndihmesa, transporte në Ballkan. Transporti i parë ka filluar thjesht me një kuti, me një arkë të vogël me gjëra medicinale. Dhe këto i kemi çuar me motorë. Transporti i dytë ka qenë tre kamiona që kanë shkuar në vitin 2004 në Bosnje. Me kalimin e viteve u zmadhua, u zgjerua ky transport. Në fillim kjo shoqatë quhej Eurobiker, pastaj më vonë u quajt Grupi i Motoristëve dhe Kamionistëve. Ne suportohemi dhe kemi ndihmë nga shumë firma private dhe nga kontaktet që kanë ata, domethënë ne arrijmë që të shkojmë në vende të ndryshme. Para gjashtë vitesh kanë qenë mysafirë në restorantin tim. Aty kemi filluar bisedën dhe lindi ideja për të ndihmuar qytetin e Pogradecit. Në fillim jemi marrë me transportin e materialeve mjekësore për spitalet dhe më vonë, sipas kërkesave të qytetit, kemi sjellë mobilje për shkolla dhe kopshte. Ky është transporti i 29-të që realizojmë dhe ne jemi nën çadrën e Komunitetit Europian”,-u shpreh Hermann Munzel, ish-president i Shoqatës së Motoristëve dhe Kamionistëve.

Bashkëpunimi me Pogradecin u bë i mundur falë Juliana Ditës, e cila është pjesë e kësaj shoqate dhe prej vitesh ka ndërmjetësuar ardhjen e ndihmave humanitare në qytetin e saj të lindjes. Ajo shprehet se kjo është hera e tretë që organizohet një transport i tillë për Pogradecin.

Ndihma humanitare nga Gjermania/ Mbërrijnë në Pogradec pajisje

“Përveçse jam banore e këtij qyteti që e dua shumë, jam edhe anëtare e kësaj shoqate. Është hera e tretë që sjellim ndihma humanitare në Pogradec. Hera e parë ka qenë në vitin 2022, e dyta në vitin 2024 dhe kjo është hera e tretë. Këtë herë transporti ka pasur edhe si qëllim mbështetjen e festës së motoristëve dhe kamionistëve, të organizuar nga Dritan Hoxha në bashkëpunim me grupin e motoristëve dhe me ndihmën e shoqatës sonë. Kamionët kanë sjellë banka, karrige, dërrasa të zeza, mjete sportive, pajisje për kabinete, si edhe krevate për paraplegjikë, karroca invalidësh dhe ndihma për familjet në nevojë”, -tha ajo.

Ndërkohë, organizatori Dritan Hoxha thekson se premtimi i bërë gjatë organizimit të aktivitetit të motoristëve është mbajtur dhe se të gjitha materialet do të shërbejnë për komunitetin, pa asnjë përfitim individual.

Ndihma humanitare nga Gjermania/ Mbërrijnë në Pogradec pajisje

“Ajo që ne premtuam po e mbajmë. Bashkë me miqtë tanë gjermanë po shkarkojmë ndihmat që kemi sjellë nga Gjermania. Falënderoj edhe mikeshën tonë Juliana, e cila bëri të mundur lidhjen mes nesh dhe Biker Brumme Hilfe. Aktualisht jemi duke shkarkuar kamionin e dytë. Siç mund ta shikoni, ka stola, banka, mjete shkollore dhe në fund edhe krevate për paraplegjikë. Komuniteti i Pogradecit do të ketë një përfitim të madh, sepse të gjitha këto materiale janë për shkollat, palestrat, ambulancat e qytetit dhe një pjesë edhe për Komisariatin e Policisë Pogradec. Asgjë nuk do të përdoret për qëllime private”,-tha Hoxha.

Ky është transporti i 29-të humanitar i realizuar nga Shoqata Gjermane e Motoristëve dhe Kamionistëve, ndërsa për Pogradecin shënon herën e tretë që përfiton nga kjo nismë. Pajisjet pritet të shpërndahen në institucionet arsimore, shëndetësore dhe sociale, duke kontribuar në përmirësimin e kushteve për nxënësit, personat me aftësi të kufizuara dhe komunitetin në përgjithësi./CNA