E fundit!

16:41 Aktualitet

Marshim dhe thirrje kundër qeverisë/ Mbahet sot protesta e 45-të në Tiranë

Ditën e sotme mbahet protesta e 45-të qytetare kundër qeve...

Ndryshimet në qeveri/ Garo: Ikën famozët për vjedhje, erdhën bosët e Ndragheta-s

5 Shtator 2023, 13:05, Aktualitet CNA

Ndryshimet në qeveri/ Garo: Ikën famozët për vjedhje,

Zëdhënësja e Partisë Demokratike, Floriana Garo, në një deklaratë për mediat tha se ndryshimet e qeverisë nga Edi Rama janë një përpjekje e dështuar, për retushim të organizatës kriminale që drejton.

Ajo tha se edhe pse largoi nga qeveria Olta Xhaçkën, famoze për vjedhjen dhe përvetësimin e pronave të ushtrisë futi në qeveri famëziun Arbjan Mazniku, ortakun e bosit të Ndragheta-s së Veronës.

“Është e vërtetë se ai dje largoi nga qeveria Olta Xhaçkën, famoze për vjedhjen dhe përvetësimin e pronave të ushtrisë, dhe për shndërrimin e burrit të saj në investitor strategjik. Por, futi në qeveri famëziun Arbjan Mazniku, ortakun e bosit të Ndragheta-s së Veronës, Migliorenzi, 'Mr. Babëzinë', që në postin e zëvendëskryetarit të Bashkisë së Tiranës, përveç rrogës si nënkryetar, merrte edhe 11 rroga të tjera. Të pangopurin që ulej në Dubai te Nusreti duke porositur biftekun 1 mijë euro, së bashku me Ballukun, Fugën etj.”

Sa i përket largimit të Ministres së Shëndetësisë dhe vendosjen e saj në Ministrinë e Arsimit, tha se mbi të rëndojnë dhjetëra dosje miliarda lekësh të vjedhura.

“Ai dërgoi në Arsim njërën nga eksponentet kryesore të krimit dhe korrupsionit në Shqipëri, Manastirliun, mbi të cilën rëndojnë dhjetëra dosje miliarda lekësh të vjedhura gjatë pandemisë së COVID-19, dhe mbi 20.000 mijë jetë të marra nga keqtrajtimi i saj, si dhe krime të tjera.

Ai dje hoqi Kushin e arsimit, që ishte një nxënëse në korrupsion, krahasuar me Denajn, bosen famoze të kontrabandës dhe vjedhjeve në dogana dhe tatime.”

“Partia Demokratike deklaron se kjo qeveri e dalë nga zgjedhjet, në të cilat krimi u shndërrua në votë dhe vota në krim, nuk ka asnjë legjitimitet dhe, po t'u shtojmë këtyre ndryshimeve edhe emërimin e Taulant Begos në krye të rendit, organizata kriminale që drejton Edi Rama sot, është më e inkriminuar se çdo qeveri tjetër në 30 vitet e fundit”, tha Garo./ CNA