E fundit!

19:25 Kronika

Aksident i rëndë në aksin Cërrik-Mollas/ Raportohet për dy viktima

Një aksident i rëndë raportohet se ka ndodhur në aksin Cër...

Ndahet nga jeta ish-kryeministri Fatos Nano

31 Tetor 2025, 14:43, Aktualitet CNA

Ish-kryeministri Fatos Nano ka ndërruar jetë në moshën 73-vjeçare. Fatos Nano nuk ka mundur të mposhtë betejën e tij me sëmundjen. Ai prej më shumë se dy javësh ishte i shtruar në spital në gjendje të rëndë shëndetësore.

Kujtojmë se Fatos Nano ka qenë tri herë kryeministër i Shqipërisë dhe për 14 vjet e 1 muaj kryetar i Partisë Socialiste.

Fatos Nano e filloi karrierën politike në vitin 1991 pasi u zgjodh sekretar i Këshillit të Ministrave dhe më pas Kryeministër në Qeverinë e Tranzicionit, që u ngrit me qëllim përgatitjen e vendit për tranzicionin drejt një ekonomie tregu dhe sistemi demokratik. Po atë vit ai u zgjodh kryetar i Partisë Socialiste.

Për 5 vite, nga marsi 1992 deri në mars 1997 Nano qëndroi në burg me akuzën për korrupsion dhe abuzim detyre nga gjykata.

Fatos Nano u zgjodh si kryeministër pas fitores së PS-së në zgjedhjet e parakohshme të vitit 1997, por në shtator të vitit 1998 u dorëhoq pas vrasjes së ish-themeluesit të PD-së, Azem Hajdari.

Nano u bë sërish Kryeministër në korrik 2002. Në 3 korrik 2005 Partia Socialiste humbi zgjedhjet dhe shumicën në Parlament. Më 1 shtator 2005 Fatos Nano dha dorëheqjen si kryetar i Partise Socialiste duke dalë përfundimisht nga politika aktive.

Ai u mundua të rikthehej në garën për president 2007, por nuk pati mbështetjen e pasardhësit të tij në krye të PS-së, Edi Rama. Shumica e deputetëve të opozitës të drejtuar nga Partia Socialiste nuk e përkrahën kandidaturën e tij dhe bojkotuan zgjedhjen e presidentit.

Si deputet i parlamentit shqiptar, Nano ka shërbyer zonën e Kuçovës, Tepelenës dhe Sarandës./ CNA