Me 13 akuza për 5 vepra penale/ Veliaj bën viktimën në "Kushtetuese": Çfarë shkelje kam bërë si kryebashkiak

31 Tetor 2025, 11:36, Aktualitet CNA

Me 13 akuza për 5 vepra penale/ Veliaj bën viktimën në

Ish-kryebashkiaku i Tiranës, Erion Veliaj, në fjalën e tij para trupës së Gjykatës Kushtetuese ka marrë rolin e viktimës duke u shprehur se në mandatin e tij si kryebashkiak nuk ka kryer asnjë shkelje të rëndë ligjore.

Ndonëse SPAK-u ka kopsitur dosjen, ku ndaj tij rëndojnë 13 akuza për 5 vepra penale dhe e ka dërguar për gjykim, Veliaj ende pretendon se mandati iu ndërpre pa të drejtë. Marrëzia e fjalimit të tij nuk përfundon me këto deklarata, ndërsa shprehet se seanca e sotme është historike, sepse testohet demokracia.

"Siç thoshte Martin Luter King, harku i universit moral është i gjatë dhe rraskapitës, por në finale edhe ky hark anon nga e drejta. Ndaj jam sot këtu si kryetari i Bashkisë Tiranë. Me të drejtën që ma kanë dhënë 160 mijë vota. Nuk kam kryer asnjë shkelje, por jam këtu para jush me respektin që meriton detyra juaj e lartë për t'ju kërkuar të mbrojmë demokracinë që sot po vihet në sprovë. Demokracinë që jemi betuar ta mbrojmë. Ky mandat është besëlidhje publike që qytetarët ë Tiranës ma kanë dhënë si njerëz të lirë. Për mbrotjen e saj do të bëj gjithçka që ma lejon ligji, fuqia e mendjes dhe forca e zemrës sime.

Nuk po mbroj një karrige, por shpirtin e një lidhjeje të qytetarit me të zgjedhurin e vet. Askush nuk mund të ndërpresë mandatin pa përfunduar vetëm nëse ka kryer një shkelje të rëndë të tij. Me respekt për këtë Gjykatë unë pyes sot cilën shkelje të rëndë kam bërë sot në ushtrimin e mandatit të kryebashkiakut? Bindja se drejtësia duhet të burojë nga Kushtetuta, jo nga protagonizmi politik apo etja për karrierë mbi kurriz të lirive të qytetarëve, është e palëkundur. Ajo çfarë Kushtetuta mbron shpresoj të thuhet më zë të lartë. Në këtë seancë nuk po shqyrtohet një vend pune, por është historike sepse shqyrton vetë demokracinë. Themelet mbi të cilat qëndron shteti ynë", tha Veliaj.

Sipas SPAK-ut, mbi Erion Veliajn rëndojnë 13 akuza për disa vepra të rënda penale.

Erion Veliaj, i akuzuar për kryerjen e veprave penale:

1. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Agi Kons” shpk, parashikuar nga neni 260 e 25 i Kodit Penal;

2. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Fusha” shpk, parashikuar nga neni 260 e 25 i Kodit Penal;

3. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Palushi” shpk, parashikuar nga neni 260 e 25 i Kodit Penal;

4. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Gerard-A” shpk, parashikuar nga neni 260 e 25 i Kodit Penal;

5. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Kontakt” shpk, parashikuar nga neni 260 e 25 i Kodit Penal;

6. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Eventus” OJF, parashikuar nga neni 260 e 25 i Kodit Penal;

7. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Muza” OJF, parashikuar nga neni 260 e 25 i Kodit Penal;

8. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “BYL-A” OJF, parashikuar nga neni 260 e 25 i Kodit Penal;

9. “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në lidhje me përfitimin e parregullt të marrë nga “Frobolous” OJF, parashikuar nga neni 260 e 25 i Kodit Penal;

10. “Pastrimi i produkteve të veprës penale ose veprimtarisë kriminale”, kryer në bashkëpunim më shumë se një herë, parashikuar nga neni 287/2 i Kodit Penal;

11. “Futja ose mbajtja e sendeve të ndaluara në institucionin e ekzekutimit të vendimeve me burgim”, më shumë se një herë, parashikuar nga neni 324/a/2 i Kodit Penal;

12. “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 257/a/2 i Kodit Penal;

13. “Shpërdorimi i detyrës”, parashikuar nga neni 248 i Kodit Penal./ CNA