KLSH zhvillon takim në Universitetin “Fan Noli”/ Transparenca, bashkëpunimi dhe roli i medias në forcimin e llogaridhënies publike

31 Tetor 2025, 13:00, Aktualitet CNA

KLSH zhvillon takim në Universitetin “Fan Noli”/ Transparenca,

Në Universitetin “Fan Noli” të Korçës u zhvillua një takim i hapur informues drejtuar nga kreu i KLSH-së, Arben Shehu dhe rektori Lorenc Ekonomi, ku pjesëmarrës ishin edhe përfaqësues të Kontrollit të Lartë të Shtetit, së bashku me pedagogë dhe studentë të këtij universiteti. Takimi kishte në fokus rolin e institucionit më të lartë të auditimit publik në vend, rëndësinë e bashkëpunimit me qytetarët dhe transparencën në komunikim me publikun.

Në një intervistë për CNA, Arben Shehu vlerësoi rëndësinë që ka bashkëpunimi me komunitetin akademik dhe me qytetarët në përgjithësi. Ai u ndal në raportin e ngushtë që institucioni ka me nevojat dhe problematikat e shoqërisë, duke theksuar se vetëm përmes dialogut të hapur dhe dëgjimit të drejtpërdrejtë të zërit të qytetarëve, mund të rritet efektiviteti i auditimeve publike. Shehu nënvizoi gjithashtu se ky komunikim ndihmon që puna e KLSH-së të mos mbetet vetëm në kuadrin institucional, por të kthehet në një kontribut real për përmirësimin e shërbimeve publike dhe të qeverisjes në tërësi.

"Ju falënderoj për prezencën dhe suportin tuaj. Ne kemi një detyrim të veçantë institucional që të jemi në një komunikim të vazhdueshëm me qytetarët, me të gjitha njësitë administrative të Shqipërisë, por me Korçën kemi një detyrim tejet të veçantë. Historia e Korçës është e lidhur me themelet e shtetformimit shqiptar, historia e Korçës është e lidhur me shkronjat shqipe, me gjuhën, me kulturën, me sakrificat e të gjithë atyre njerëzve që dhanë gjithçka kishin në jetën e tyre për t’u dhënë një rrugë të denjë shqiptarëve dhe shtetit shqiptar. Kuptohet që detyrimet institucionale janë të ndërlidhura me nevojat dhe problematikat e shoqërisë, dhe marrja më e mirë e dijenisë për të gjitha këto nevoja mund të bëhet nëpërmjet konstatimeve të qytetarëve."

Shehu solli në vëmendje lidhjen e veçantë që institucioni ndien ndaj qytetit të Korçës, duke e konsideruar këtë bashkëpunim si pjesë të një detyrimi moral dhe historik. Sipas tij, Korça përfaqëson një qendër të rëndësishme të kulturës, arsimit dhe historisë kombëtare, ndërsa universiteti i qytetit është një partner me peshë në forcimin e transparencës dhe edukimit qytetar.

"Ne sot kemi zgjedhur të realizojmë këtë takim dhe patëm fatin ta zhvillojmë me vullnetin e mirë të stafit pedagogjik të Universitetit të Korçës, të studentëve dhe me suportin tuaj të veçantë, për të evidentuar dhe marrë ato nevoja që institucioni jo vetëm i ka detyrim, por i ka qëllim në vetvete, për të marrë thelbin e nevojave e problematikave dhe për t’i transmetuar ato në auditime të posaçme, në mënyrë të tillë që institucioni i Kontrollit të Lartë të Shtetit jo vetëm të realizojë detyrimet institucionale e kushtetuese, por të jetë në thelb kontribues në jetën e shoqërisë shqiptare. Ju falënderoj në mënyrë të veçantë dhe do të doja që ky komunikim me ju të ishte i vazhdueshëm, për hir të nevojave të përbashkëta që ka jo vetëm institucioni ynë, por edhe shoqëria shqiptare, dhe për hir të vendit që keni ju në shoqërinë shqiptare nëpërmjet kontributit tejet profesional dhe, nëse nuk gaboj të them, nëpërmjet sakrificave që ju, mediat dhe gazetarët jo vetëm të Korçës, por edhe të gjithë Shqipërisë, jepni për ecjen përpara të shoqërisë shqiptare."

Një pjesë e veçantë e diskutimit iu kushtua rolit të medias. Kreu i KLSH-së vlerësoi kontributin e gazetarëve në identifikimin e problematikave të shoqërisë dhe në nxitjen e përmirësimeve institucionale. Sipas tij, media sot ka arritur një stad të lartë profesionalizmi, duke shërbyer jo thjesht si mekanizëm kritikues, por si partner në kërkimin e zgjidhjeve.

"Përgjigjja e kësaj pyetjeje është komplekse, sepse puna e medias dhe kontributi i saj në shoqërinë shqiptare janë kompleksë. Unë, siç thashë, e vlerësoj jo vetëm personalisht, por edhe në emër të të gjithë institucionit, rolin që ka media sot si një faktor thelbësor e themelor në ecjen përpara të shoqërisë shqiptare. Mund të them se media, për fat të mirë të të gjithë shqiptarëve, sot ka arritur një stad të lartë, një nivel të lartë të skanimit të të gjitha nevojave, për të mos thënë edhe problematikave, dhe për t’i evidentuar ato jo në formën ndëshkimore, por në formën e një kërkese për përmirësim e rregullim, në mënyrë që shoqëria shqiptare në tërësi të ecë përpara."

Takimi u mbyll me një bashkëbisedim të hapur me studentët dhe pedagogët, ku u ngritën pyetje mbi mënyrën se si KLSH ndërmerr auditimet, si trajtohen problematikat e konstatuara dhe si mund të forcohet më tej bashkëpunimi me institucionet e arsimit të lartë. Ky aktivitet ishte pjesë e turit të takimeve që Kontrolli i Lartë i Shtetit po zhvillon në universitete të ndryshme të vendit, me qëllim afrimin e institucioneve të kontrollit me publikun, nxitjen e transparencës dhe përfshirjen e brezit të ri në kulturën e llogaridhënies publike./ CNA