"Politizimi i gjyqësorit, sfidë e vazhdueshme"/ Apeli i kryetares së Gjykatës Kushtetuese
27 Nëntor 2023, 11:12, AktualitetCNA
Kryetarja e Gjykatës Kushtetuese
Kryetarja e Gjykatës Kushtetuese, Olta Zaçaj, gjatë fjalës së saj në Kuvend, theksoi se ndikimi politik në sistemin gjyqësor mbetet ende një fenomen shqetësues. Ajo nënvizoi se pushteti gjyqësor, mund të luajë rolin e tij kushtetues nëse është i pavarur.
“Politizimi i Gjyqësorit dhe Gjyqësorizimi i politikës kanë qenë dhe janë fenomene që jo vetëm përbëjnë sfida të vazhdueshme të demokracive në vazhdim po edhe atyre të konsoliduara. Reforma kushtetuese e 2016, synoi shkëputjen e ndikimin të politikës në zgjedhjen e gjyqtarëve të lartë duke bërë një përpjekje domethënëse për depolitizimin e gjyqësorit. Gjyqësorizimi i politikës për shkak të referencës kushtetuese në veprimtarinë dhe proceset e politkëbërjes është një trend në rritje. Aksionet e rëndësishme politike e kanë devijuar diskurin politik nga organi i zgjedhur nga populli në një debat gjyqesor kushtetues”, - tha Zaçaj.
Ajo theksoi se Gjykata Kushtetuese është përfshirë në disa prej reformave më të rëndësishme dhe se ndikimi i saj është i rëndësishëm në jetën politike të vendit.
“Gjykata është e përfshirë në reformat e rëndësishme, zgjedhore, territoriale, gjyqësore, konfliktet e kompetencave dhe kushtetueshmëria e nismave ligjore. Gjyqësorizimi i politikës tregon nga njëra anë nevojën dhe rolin e pazëvendësueshmë të Gjykatës Kushtetuese në interpretimin përfundimtar të Kushtetutës, por nga ana tjetër tregon edhe rrezikun e transformimit të gjykatës në pjesë të procesit politikëbërës. Gjykata është e vetëdijshme se edhe pse nuk bën politikë, ajo ndikon në jetën politike të vendit. Në vendimet e saj gjykata është munduar t'i shmanget aktivizmit gjyqësor në respekt të parimit të ndarjes dhe balancimit të pushteteve duke kontribuuar përmes interpretimit pajtues në ruajtjen dhe shpëtimin e normave ligjore brenda rendit juridik kur kjo është e mundur”, – u shpreh Zaçaj./CNA
