web counter
LEXO PA REKLAMA!

SHKARKO APP

App Store
Google Play

E fundit!

x

Jetë dhe dëshmi e gjallë e besimit/ Fortlumturia e Tij, Joani feston 70-vjetorin e lindjes

1 Janar 2026, 09:14, Aktualitet CNA

Jetë dhe dëshmi e gjallë e besimit/ Fortlumturia e Tij, Joani

Më 1 janar 2026, Kryepiskopi i Tiranës, Durrësit dhe Gjithë Shqipërisë imzot Joani, feston 70-vjetorin e lindjes, një jubile i veçantë që nuk shënon vetëm një moshë, por një jetë të tërë të jetuar si dëshmi e gjallë e hirit të Perëndisë, besnikërisë ndaj Krishtit dhe shërbimit të përulur ndaj Kishës dhe popullit shpresëtar.

I lindur në Tiranë më 1 janar 1956, në një Shqipëri të mbyllur, të persekutuar dhe zyrtarisht ateiste, Fortlumturia e Tij u rrit në vitet më të errëta të diktaturës komuniste, në një kohë kur besimi ishte i ndaluar me ligj dhe shprehja fetare ndëshkohej me burg, internim apo edhe me vdekje. Megjithatë, siç dëshmon vetë ai, “nuk mundën ta mbyllnin derën e Zotit”.

Takimi i tij i parë me Krishtin ndodhi në mënyrë të mrekullueshme, përmes leximit të Dhiatës së Re në frëngjisht; një kohë kur të zotëroje një Ungjill ishte më e rrezikshme sesa të kishe dinamit.

Fjalët e Krishtit i rikthyen gëzimin e humbur të fëmijërisë dhe ndezën një etje të thellë shpirtërore, e cila do ta udhëhiqte gjithë jetën e tij.
Në fshehtësi të plotë, në bodrumin e një shtëpie private të Priftit Hero në Bestrovë të Vlorës, atë Kozmait, në vitin 1974 u pagëzua dhe u bë pjesë e Kishës Ortodokse të nëndheshme – një Kishë e vogël, por e gjallë, e ushqyer nga martirizimi, sakrifica dhe besimi i palëkundur.

Në ato rrethana, gëzimi i Krishtit përjetohej me një intensitet të rrallë, që vetë Kryepiskopi Joan e ka cilësuar si "të papërsëritshëm".
Pas rënies së regjimit komunist, ai studioi teologji në Shtetet e Bashkuara të Amerikës në Seminarin Teologjik "Holy Cross" në Boston, i mbështetur nga Kisha Ortodokse Shqiptare, por me një premtim të qartë: kthimin në atdhe sapo Kisha të rihapte dyert e saj. Dhe ashtu bëri. Në një Shqipëri të shkatërruar shpirtërisht e materialisht, ai u kthye për të shërbyer, duke zgjedhur vështirësinë dhe sakrificën. Ai u bë njëri nga bashkëpunëtorët më të ngushtë të Kryepiskopit Anastas duke qënë në të djathtë të tij në të gjitha sfidat, vuajtjet dhe persekutimet si një bir besnik dhe i denjë i Kishës së shenjtë dhe Kryebariut të saj.

Prej 27 vitesh, Fortlumturia e Tij imzot Joani shërbeu si Mitropolit i Korçës, duke u bërë një figurë atërore për dhjetëra priftërinj, mijëra besimtarë dhe për gjithë qytetin. Nën kujdesin e tij baritor, Mitropolia e Korçës u shndërrua në një qendër të gjallë shpirtërore, kulturore dhe shoqërore. Restaurimi i katedrales historike të qytetit "Burimi Jetëdhënës" është jo vetëm një projekt ndërtimor, por një akt rikthimi të kujtesës historike dhe identitetit shpirtëror të Korçës.

Si anëtar i Sinodit të Shenjtë të Kishës Orthodokse Autoqefale të Shqipërisë, nën drejtimin e Kryepiskopit të lumur imzot Anastasit, Fortlumturia e Tij imzot Joani ka qenë dëshmitar dhe bashkëpunëtor i ringjalljes së mrekullueshme të Kishës në Shqipëri – një ringjallje që shumëkush e quan mrekulli të kohëve moderne.

Mësimi i tij është thellësisht i bazuar mbi Ungjillin dhe mësimin e Etërve të mëdhenj të Kishës: "Pa sakrificë nuk ka gëzim, pa kryq nuk ka ngjallje, pa dashuri nuk ka jetë".

Ai na kujton se "urrejtja shkatërron gjithçka, ndërsa egoizmi është e kundërta e dashurisë. Vetëm duke parë ikonën e Perëndisë në çdo qenie njerëzore, njeriu mund të quhet me të vërtetë i krishterë".





Lajmet e fundit nga