E fundit!

15:38 Aktualitet

Goditi protestuesin në Zvërnec/ Ndryshon masa e sigurisë për një nga punonjësit e sigurisë së kantierit

Gjykata e Apelit ka ndryshuar masën e sigurisë për një ng...

Festat e fundvitit/ Autoriteti Rrugor Shqiptar prezanton planin e masave

31 Dhjetor 2025, 13:47, Aktualitet CNA

Drejtori i Autoritetit Rrugor Shqiptar, Ami Kozeli, ka prezantuar planin e masave të marra për festat e fundvitit.

Kozeli shprehet se ARRSH është në gatishmëri dhe ka marrë masat për të siguruar një qarkullim të vazhdueshëm në të gjithë akset rrugore në gjithë vendin.

Ai u ka bërë thirrje të gjithë drejtuesve të mjeteve që të pajisen me goma dimërore dhe të kenë zinxhirë në makinat e tyre, për të siguruar që të mos ketë bllokime të akseve dhe qarkullimi të jetë i vazhdueshëm.

“Sot është dita e fundit e vitit dhe ashtu sikundër çdo vit pritet një fluks i shtuar i automjeteve në të gjitha akset e Shqipërisë. ARRSH, së bashku me të gjitha ekipet nënkontraktore, është në gatishmëri të plotë dhe ka marrë të gjitha masat për të siguruar një qarkullim të vazhdueshëm në të gjitha akset rrugore në mbarë Shqipërinë. Gjatë mbrëmjes së sotme dhe në orët e para të mëngjesit, janë regjistruar reshjet e para të dëborës me intensitet të ulët në zonën Juglindore, konkretisht në aksin Qafë Thanë - Kapshticë, Boboshticë - Dardhë dhe Korçë - Ersekë. Ndërkohë që në zonën Veriore, reshje dëbore ka pasur në aksin Kukës - Shishtavec në lartësinë mbi 700 metra.

Temperaturat më të ulëta janë regjistruar në zonën e Valbonës, ku termometri ka shënuar -11 gradë Celsius, ndërkohë që në zonën e Thethit temperaturat kanë qenë në -5 gradë Celsius. Bazuar në parashikimet e motit, gjatë natës së ndërrimit të viteve, por veçanërisht edhe në ditët e para të vitit të ardhshëm, temperaturat do të jenë ndjeshëm më të ulëta dhe për këtë ARRSH ka marrë gjithë masat paraprake, ku do të jenë në gatishmëri 130 borëpastruese, 577 mjete të tjera dhe 800 punonjës, të cilët do të jenë në gatishmëri 24 orë.

Gjithashtu, janë prokuruar 5300 tonë kripë dhe 1800 tonë granil për të siguruar që të gjithë akset të jenë të lira nga dëbora. U bëj thirrje të gjithë drejtuesve të mjeteve që të pajisen me goma dimërore dhe të kenë zinxhirë në makinat e tyre, kjo për të siguruar që të mos ketë bllokime të akseve dhe qarkullimi të jetë i vazhdueshëm. Viti 2025 ka qenë një vit mjaft i suksesshëm për Autoritetin Rrugor Shqiptar, ku janë dorëzuar vepra shumë të rëndësishme strategjike të infrastrukturës rrugore, sikundër kemi pasur dhe një ecuri mjaft të kënaqshme të të gjitha kantiereve.

Sot unë po flas nga kantieri i Tiranë - Durrës, ku ecuria ka qenë mjaft pozitive, por paralelisht ecuri shumë të mirë ka pasur edhe kantieri i Elbasan - Qafë Thanë, Elbasan - Rrogozhinë dhe Berat - Ballabanit. Gjej rastin të falënderoj të gjithë punonjësit e Autoritetit Rrugor Shqiptar, pasi pavarësisht sfidave të vitit 2025, falë tyre ka qenë i mundur dorëzimi i veprave strategjike të përmendura më parë. Ashtu sikundër, jam besimplotë që viti 2026, pavarësisht sfidave që ai do të ketë, do të jetë një vit shumë i suksesshëm për Autoritetin Rrugor Shqiptar dhe infrastrukturën rrugore shqiptare”, u shpreh Kozeli. /CNA