web counter
LEXO PA REKLAMA!

SHKARKO APP

App Store
Google Play

E fundit!

x

Hetimet për Kadastrën, mbi 500 denoncime edhe në platformën online

23 Qershor 2022, 15:40, Aktualitet CNA
Hetimet për Kadastrën, mbi 500 denoncime edhe në platformën
Foto ilustruese

Zhdukja e faqeve nga regjistrat në kadastrën e Tiranës po hetohet nga drejtuesi i prokurorisë së kryeqytetit. Në hetim janë edhe disa zyra të tjera vendore të Kadastrës, ndërsa Euronews Albania mëson se mbi 500 ankesa kanë mbërritur edhe në platformën “Denonco kadastrën”.

Kryeprokurori i komanduar i Tiranës, Arens Çela ka kërkuar listën e zyrtarëve të Hipotekës ndër vite, që kanë pasur akses në regjistrat kadastral. Përmes saj pritet të nxirren emra të dyshuarish konkretë për hetimin që ka nisur për “Shpërdorim detyre” dhe “Zhdukje dhe vjedhje të dokumenteve”.

Prokuroria nisi hetimet kryesisht pas deklaratave të drejtorit të përgjithshëm të Agjencisë Shtetërore të Kadastrës, Artan Lame.

Sipas auditit të brendshëm kanë humbur ose janë dëmtuar faqe të regjistrave të kadastrës, për zonat në zhvillim të Tiranës si Farka, Ndroqi e Shën Gjergji.

E njëjta situatë është konstatuar edhe në kadastrën e Durrësit, ku vetëm 15 % dosjeve dhe regjistrave kanë rezultuar pa probleme, rast për të cilin prokuroria ka nisur që në muajin mars hetimet.

Njësia anti-korrupsion pranë Ministrisë së Drejtësisë po heton disa zyra të Kadastrës në zonat e tjera bregdetare, ku në Sarandë pak javë më parë u ndaluan disa zyrtarë e ish-punonjës.

Burime nga kjo strukturë bëjnë me dije për Euronews Albania se në adresë të Kadastrës janë administruar edhe 513 denoncime nga qytetarët, në platformën “Denonco kadastrën” që është ngritur 8 muaj më parë./euronews 





Lajmet e fundit nga