E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Forumi i Dohas 2025/ Ministrja Sala takim me homologun e Katarit

7 Dhjetor 2025, 14:52, Aktualitet CNA

Ministrja e Shëndetësisë dhe Mirëqenies Sociale, Evis Sala zhvilloi sot një takim me Ministrin e Shëndetit Publik të Shtetit të Katarit, Mansoor bin Ebrahim bin Saad Al Mahmoud, në kuadër të Forumit të Dohas. Takimi u përqendrua në forcimin e bashkëpunimit mes dy vendeve në sektorin e shëndetësisë, shkëmbimin e praktikave më të mira dhe identifikimin e fushave me potencial për projekte të përbashkëta.

Gjatë diskutimeve, ministrja Sala theksoi se transformimi i shëndetësisë është sfida kryesore për Shqipërinë, duke identifikuar tre prioritete strategjike:

• Përmirësimi i menaxhimit të shërbimeve shëndetësore, me qëllim rritjen e cilësisë dhe aksesit për pacientët.

• Integrimi i shërbimeve të mirëqenies sociale dhe shëndetësore, për të ndërtuar një model të unifikuar dhe efektiv të kujdesit ndaj qytetarëve.

• Digjitalizimi dhe zhvillimi i inteligjencës artificiale në shëndetësi, si bazë për një sistem modern dhe të qëndrueshëm.

Ministrja theksoi se vendi ka nevojë të ngrejë arkitekturën e sistemeve digjitale që sigurojnë ndërveprueshmëri, një komponent thelbësor për funksionimin efikas të sektorit dhe për zhvillimin e aplikimeve të avancuara të AI në shëndetësi. Ajo nënvizoi se ky transformim do të shërbejë si bazë e një sistemi shëndetësor të qëndrueshëm, të integruar dhe të orientuar drejt inovacionit.

Të dy ministrat shprehën vullnetin për të vijuar bashkëpunimin institucional dhe ranë dakord që ekipet teknike të dy vendeve të punojnë në muajt e ardhshëm drejt konkretizimit të marrëveshjeve dhe iniciativave të reja të përbashkëta.

Forumi i Dohas, që këtë vit u mbajt në datat 6 - 7 dhjetor 2025 me temë: Drejtësia në veprim - progresi përtej premtimeve dhe me fokus tek shëndetësia, financa e sfidat globale është një platformë globale për dialog, që bashkon liderët në politikë për të diskutuar sfidat kritike me të cilat përballet bota jonë dhe për të ndërtuar rrjete inovative dhe të nxitura nga veprimi. /CNA