web counter
LEXO PA REKLAMA!

SHKARKO APP

App Store
Google Play

Kryeqyteti i festimeve të fundvitit hap zyrtarisht sezonin/ Korça transformohet në destinacionin magjik për festat

6 Dhjetor 2025, 19:19, Aktualitet CNA

Korça ka nisur zyrtarisht sezonin e festave, teksa mbrëmjen e sotme janë ndezur dritat dhe dekorimet që i japin qytetit pamjen e shumëpritur të dhjetorit. Qindra qytetarë dhe vizitorë u mblodhën për të përjetuar momentin kur qyteti u transformua në një hapësirë të ndritur, plot ngjyra dhe magji festash. Këtë vit, zbukurimet janë përqendruar në disa prej zonave më të frekuentuara të qytetit. Zona këmbësore e pedonales, e njohur për gjallërinë dhe atmosferën e saj të përhershme, është shndërruar në një rrugicë plot shkëlqim, me instalacione drite dhe dekorime festive që krijojnë një ambient të ngrohtë për kalimtarët.

Sheshi para Katedrales është dekoruar në mënyrë të veçantë, duke u kthyer në një nga pikat më të fotografuara dhe më të vizituara të sezonit. Dritat, pemët e zbukuruara dhe instalacionet artistike krijojnë një atmosferë solemne dhe festive njëkohësisht. Ndërkohë, Bulevardi “Gjergj Kastrioti” është zbukuruar në të gjithë gjatësinë e tij, duke ofruar një shëtitje të ndritur e festive për qytetarët. Pemë të dekoruara, figura ndriçuese dhe elementë artistikë krijojnë një bukuri të veçantë që e shoqëron çdo hap të kalimtarëve.

Përveç dekorimeve, gjatë gjithë muajit dhjetor Korça do të ofrojë një kalendar të pasur me aktivitete kulturore, koncerte, evente për fëmijë dhe panaire festive, të cilat pritet të tërheqin vizitorë nga e gjithë Shqipëria dhe jashtë vendit. Kapacitetet akomoduese të qytetit raportojnë një interes të lartë dhe prenotime të shumta, duke konfirmuar se Korça mbetet një nga destinacionet më të preferuara të këtij sezoni. Me ndezjen e dritave, qyteti ka hapur zyrtarisht sezonin e festave, duke ofruar një atmosferë të ngrohtë, të gjallë dhe plot surpriza për këdo që vendos ta vizitojë. /CNA





Lajmet e fundit nga