web counter
LEXO PA REKLAMA!

SHKARKO APP

App Store
Google Play

Kremtohet sot Dita e Shën Nikollës/ Kryepiskopi Joan drejton Liturgjinë Hyjnore në Kavajë

6 Dhjetor 2025, 16:37, Aktualitet CNA

Ditën e sotme kremtohet Dita e Shën Nikollës, në të gjitha Mitropolitë e Shqipërisë, në Tiranë, Durrës, Korçë, Gjirokastër, Fier, Berat, Elbasan.

Kjo ditë u kremtua edhe në qytetin e Kavajës në kishën që mban emrin e Shën Nikollës. Forlumturia e Tij, Kryepiskopi i Tiranës, Durrësit dhe Gjithë Shqipërisë imzot Joani drejtoi Liturgjinë Hyjnore në këtë kishë në të cilën merrnin pjesë shumë besimtarë si nga Kavaja, Durrësi, Tirana etj.

Në fjalën e tij plot urtësi ai theksoi mësime nga jeta dhe shembulli i shenjtorit si rregulli i besimit, butësia, përulësia dhe dashuria për të pambrojturin.

“Sot ne nderojmë Shën Nikollën. Arsyeja që kulti i tij është përhapur kudo është e shumëfishtë. Shën Nikolla nuk ka shkruajtur asnjë libër e as nuk ishte orator i madh, e megjithatë ishte një nga shenjtorët më të dashur në historinë e Kishës.

Sepse e donte shumë Krishtin dhe u modelua duke pasur parasysh jetën e Krishtit. Duke bërë këtë filloi të bëhet i ngjashëm me Krishtin. Ikona e Perëndisë ndodhet në çdo njeri, ngjashmëria është një mundësi që na jepet ne. Dhe na jepet kjo mundësi nëse ne do të fillojmë të jetojmë sipas mësimeve që na vijnë nga mësimi i Zotit, i Ungjillit”, u shpreh Kryepiskopi Joan ndër të tjera gjatë predikimit.

Shën Nikolla, peshkopi i Mirës së Likisë ka jetuar në shekullin IV. Dallohej për dhuratat e dhëna fshehtas dhe nga ky fakt lindi legjenda e Santa Klaus. Shën Nikolla është shenjti mbrojtës i fëmijëve, marinarëve, jetimëve, etj. Nikolla do të thotë "Fitorja e popullit". /CNA





Lajmet e fundit nga