E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Fermerët e Ormanit, kërkesë institucioneve: Verifikoni farën e patates, dëmi ekonomik, miliona lekë

29 Maj 2026, 10:24, Aktualitet CNA

Dhjetëra fermerë të fshatit Orman në Bashkinë Maliq po përballen këtë vit me një humbje të madhe ekonomike, pasi fara e patates që kanë blerë në një subjekt privat ka rezultuar jo cilësore, duke bërë që një pjesë e madhe e prodhimit të mos mbijë ose të degradojë plotësisht në tokë.

Fermerët thonë se dëmi arrin në miliona lekë dhe kërkojnë ndërhyrjen e institucioneve shtetërore për verifikimin e farës, analizimin e saj dhe dëmshpërblim për humbjet e shkaktuara. Sipas tyre, problemi nuk ka ardhur nga toka apo mënyra e kultivimit, por nga cilësia e farës së përdorur këtë sezon.

Prej më shumë se dy dekadash, fermeri Krenar Kreka tregon se ka punuar me të njëjtën lloj fare patateje, por këtë vit situata ka qenë katastrofike. Ai shprehet se mbi 75 për qind e farës ka rezultuar e fijëzuar dhe nuk ka prodhuar, ndërsa dëmi ekonomik për familjen e tij kalon 30 milionë lekë.

“Ne kemi punuar prej 25 vitesh me këtë lloj fare patate, karlit quhet, dhe nuk na ka dalë asnjëherë siç ka dalë sivjet. Sivjet ajo është mbi 75-80% e fijëzuar fare, që s’ka dalë fare. Po edhe ajo që ka dalë është jashtë çdo gjëje. Ja, ju e patë vetë, është e degraduar domethënë."

Ai akuzon mungesën e kontrolleve dhe kërkon që institucionet shtetërore të verifikojnë farën që sipas tij ka hyrë në treg pa analizat e nevojshme.

“Problemi qëndron këtu sepse shteti nuk i ka bërë analizat si duhet që kur ka hyrë në doganë. Ose ai burri e ka falsifikuar, e kam marrë ne Enver Shaholli në Lumalas, ka një filial tjetër ai që quhet Qemal Petriti edhe ai nuk e pranon domethënë këtë gjë, e pranon që të kam dhënë farën po nuk është me probleme thotë. Fakti ja ku është këtu, analizat e tokës i kam bërë, janë të tëra kartat në Bujqësinë e Korçës. Unë i thosha bëni analizë për kokrrën e patates, ata bëjnë analizë për vrukun e patates pa dalë patatja. E kemi blerë gjithmonë te i njëjti person dhe është hera e parë që goditemi kështu. Unë kam tre fëmijë të vegjël dhe dëmi është mbi 30 milionë lekë dhe unë nuk e di çfarë do të bëj tani.”

Fermeri thotë se ka njoftuar institucionet dhe paralajmëron se çështjen do ta ndjekë deri në fund edhe në rrugë ligjore.

“Unë do ta vazhdoj deri në fund se tre fëmijë të vegjël duan bukë atje në shtëpi. Deri në fund. Edhe në rrugë ligjore, në të tëra, se unë nuk kam çfarë bëj. Neve bujqësinë kemi, s’kemi gjë tjetër.”

Edhe bashkëshortja e Krenarit, Jorida Kreka flet për një situatë tepër të rëndë financiare dhe emocionale për familjen e saj. Ajo tregon se janë kryer të gjitha punimet bujqësore me kosto të larta, ndërsa në fund toka ka mbetur pa prodhim.

“Shumë e vështirë siç e shikoni janë gjithë këto dylym të ikura kot. Është pluguar, është frezuar, është mbjellë. Nafta në atë kohë na ka shkuar me dy mijë lekë që është bërë punimi i kësaj.”

Ajo kërkon ndërhyrje të menjëhershme nga shteti dhe dëmshpërblim për fermerët e dëmtuar.

“Shpenzimi gjithsej që del kostoja në fund të korrikut të kësaj që duhet ta shisja unë, del mbi 30 milionë dëm për mua. Duam dëmshpërblim! Dua ndihmë nga shteti të kontrollojë nga hyri kjo farë që është e fijëzuar.”

Shqetësime të ngjashme ngre edhe fermeri Daniel Plasa, i cili thotë se problemi është i përhapur edhe në parcela të tjera dhe kërkon ndërhyrjen e shtetit për mbrojtjen e fermerëve.

“Për mallin që shikoni këtu, është i gjithi djerë sot në këtë fazë që shikohet. Arsyeja kryesore është fara. Fara është e degjeneruar, asgjë më shumë. Shteti duhet të ndikojë në këto gjëra, duhet të na mbrojë.”

Fermeri thotë se për shumë familje bujqësia është i vetmi burim jetese dhe humbja e këtij sezoni rrezikon të lërë pa të ardhura dhjetëra fermerë.

“Ne kemi mbi 25 vjet me këtë punë. E dimë se çfarë ndodh ndaj bimës. Them se do na ndihmojë shteti. Nuk e besoj të na lerë në këtë fazë që jemi. Ne për familjen punojmë.”

Fermerët e Ormanit kërkojnë që institucionet përgjegjëse të kryejnë analizat laboratorike për farën e patates, të përcaktojnë përgjegjësitë dhe të marrin masa konkrete për dëmshpërblimin e tyre, pasi sipas tyre dëmet e këtij viti kanë vënë në rrezik mbijetesën ekonomike të familjeve që jetojnë vetëm nga bujqësia./ CNA